Costa Rei I nach Pula I (15.04.2014)

Tiefpunkt vo de Reis erreicht?

Mir sind vo de Schöne Costa Rei losgfahre und a de Küste entlang richtig Cagliari. Uf halber Strecki hetts im Wohnmobil widr mol noch fuule Eier gstunke. Scho widr d Batterie wo am Überkoche isch? Ok, fahrt hämmer nümm chönne gniesse, Navi hämmer uf di nächst Renault Garage umprogrammiert, zmittst i de Stadt. Aber plötzlich hetts nümm gstunke, Batterie isch nid warm gsi und kei Problem meh.

Do mer bi dere Garage nieneds parke händ chönne, simmer denn witer Richtig Hafe wos gueti Parkmöglichkeite gitt. Beidsitig hämmer alles abgfahre, hinde inne e Brüelends Chind aber kei Parkplatz wo frei isch. Nume Italiener wo us zwei Fahrspure gfühlti zehn mached :o). Irgendwenn hämmers denn ufgeh und sind uf de einzig Camping i de Nöchi wo offe hett.

De Camping isch en riesige Dauercamperplatz gsi, hett no ganz wenig Platz für Zelt und Camper gha. Zum Glück sind aber nume die leere Wohnwäge dört gstande. Wies aber oft uf so Campingplätz isch, d Sanitäriirichtige snd unter aller Sau gsi. Naja, irgendwo müemer übernachte und mit Chind stelle mer eus nid eifach uf ene Parkplatz.