Hütt hämmer eus am Morge Zit loh chönne, will d Fähri in Pembroke erscht am halb 3 abgfahre isch. Also hämmer zerscht gmüetlich z mörgelet und denn eus langsam uf de Weg gmacht.
Schlussendlich simmer aber denn glich viel z früeh am Fährterminal gsi und händ halt den warte müesse. S Wätter isch super gsi, scho fascht chli z heiss.
Wo d Fähri denn pünktlich abglegt hett, hett si zerscht us de Bucht usefahre müesse, was scho fascht e Stund gange isch. Aber den hett si gas geh chönne und um eus isch nume no s offene Meer gsi. S Wetter hett sich denn au nüm vo de beschte Site zeige welle, je meh mer richtig Irland cho sind. Also simmer inegsässe und händ de Kopf no es Stündli uf de Tisch glegt, und händ e rundi gschlofe.
Noch über vier Stunde Fahrt simmer denn chli verspötet in Rosslare acho. S Wetter isch grau gsi, und s hett au chli gwindet. Als erschts simmer euse Benzintank go fülle (Windschattefahre hintereme Wohnmobil rentiert! Händ so 1-2 Liter weniger pro 100km bruucht) und denn eus au wider mit früsche Ässware go idecke gange. Wo mer denn uf em Camping in Wexford acho sind hämmer zerscht no e halb Stund warte müesse, bis d Rezeption wider offe gsi isch. Schlussendlich hämmer grad no die letzte beide Plätz becho, eine ohni Strom, eine direkt näbem Spielplatz und de Abfallentsorgig. Es anders Wohnmobil wo noch eus anegfahre isch, hett kei Platz meh becho.
Das mit de Spielende Chinder hett sich denn aber bald erledigt gha, wills afange rägne hett.
