Wie scho i de letschte Täg hetts am Morge grägnet und gstürmt. Mir sind denn richtig Roundwood ufbroche will mer do plant händ am nächste Tag e chleini Wanderig z mache.
Am Mittag wo mer denn uf em Campingplatz acho sind, hett de Räge ufghört und mir händ eus mol igrichtet.
Spöter simmer denn durch da chleine Dörfli gloffe und sind no go poste. Do isch schinbar s höchste Pub vo Irland, da hett aber leider gschlosse gha.
So chlei wie s Dörfli isch, umso grösser isch d Chille. Isch e schön helli Chille gsi, mit viel Farbe. D Chillene bi eus sind immer rächt alt, au vo de inneusstattig. Die isch anderscht gsi. S Gebäude isch zwar au scho über 150 Johr alt, doch dinne hett mer immerwieder öppis gmacht und so isch si eigentlich no rächt speziell gsi, zum Bischpil d Wänd sind mit ganz chleine Chachle bedeckt gsi (schätzigswiis us de 80er Johre) und hinde hetts e Uhr ufghängt gha, so e Chuchiuhr öppe... :o)
