De hüttig Tag cha mer mit drei Wörter beschriibe: Räge, Wind, kalt. De Irisch Summer hett sich vo de schlechtischte Site zeigt! Scho i de Nacht hetts so gwindet und Grägnet, dass mer mehrmols ufgwacht sind. Trotzdem hämmer eus ufgrafft und sind zerscht d "military road" abgfahre, das isch e alti, schmali Stross wo durch d Bärge und Heide / Moorlandschafte füehrt. Leider hämmer chli wenig gseh, will mer voll i de Wolke gfahre sind wobi das au sin Reiz gha hett. So stellt mer sich doch immer Irland vor, oder nid?
Überall uf de Strecki hett mer (leider) immerwieder Abfallbärge gseh, oder Sache wo verbrennt worde sind. Au da Auto isch eifach uf eme Parkplatz gstande....
Nocher hämmer denn Glendalough welle go aluege. Mir sind denn es stückli zu dene Ruine anegloffe, aber es hett so gschifft, dass mer vorher wider kehrt händ, will mer so nass worde sind. Immerhin hetts für es par Fotos us de Entfernig glängt...
Am Obe, nochdem mer wider trockeni Kleider agleggt gha händ, simmer denn in es Pub und händ no es par Guinness gnosse. Uf em Heimweg hett en so en klare Himmel gha, me hett alli Stärne gseh. Das isch jo mol es guets Vorzeiche für de nächsti Tag!
