Zerscht wo mer ufgstande sind hetts sogar blaue Himmel gha! Aber da will do in Irland nüt heisse. De Räge hett nid lang uf sich warte loh. Aber es hett immer nume kurz grägnet und denn isch es wider trocke worde, endlich nümm Duurräge!
Also simmer ufbroche und mit em Bus öppe e Stund i d Innestadt gfahre. Drei Ziel hämmer eus gsetzt gha: The Book of Kells (do händ es par Möch en Wettschtrit gha, wer die schöner Bible molt, aber wer meh drüber wüsse möcht, da cha mer sicher Google. Wie au immer, die sind i de Unibibliothek vo Dublin azluege gsi. Leider hämmer do devo kei Bilder mache dörfe.) Denne natürlich au d Guinness Brauerei und d Tempelbar (e Pubviertel i de Innestadt)
Für d Brauerei hämmer denn quer durch d Stadt laufe müesse. S Bierbraue direkt hämmer nid chönne aluege, es hett aber es rächt grosses Touri-Zenter gha, wo eim Gschicht vom Guinness und s Bierbraue erklärt hett. Leider isch es chli e Show gsi und ebe wirklich voll touristisch! Aber egal schlussendlich hett mer denn es Bier am Schluss vo dem Rundgang chönne hole und d Sicht us em 7te Stock über die ganz Stadt gniesse chönne. Bevor mer usegange isch, hetts no en Souvenirshop gha, wo mer eus denn mit T-Shirt ideckt händ :o)
Nocher simmer denn so uf de Felge gsi, dass mer nume no kurz durch das Pub Viertel sind, und kurzi Abstächer id Pub gmacht händ wo Live Muusig gloffe isch bevor mer denn wider uf de Bus zrugg sind.
