Anreise nach Römö DK (12.07.2006)

Dr Kiss het am Tag vo dr Abreis no gschafft, eigentlich nur bis am Mittag - aber denn isch glich öpe 17.00 wordä! Dr Goran het dr Mäntig mit ichaufä verbrocht, so vieles het eus no gfehlt. s'Büsli het me denn au no müesse in dr Garage go holä und denn no sunscht Sache händ müesse gmacht wärde... z.B. d'Stüürerklärig vom Kiss :-) Mir händ also e richtigä "Vorferiä-Stress" gha wo bis öpe am 1.00 Uhr gange isch... Nochdem mir denn endlich alles packt gha händ simmer zerscht no in Magde go tanke und ab die Post! Kurz vor em Zoll in Basel händ mr scho biz Angscht becho, dass mir alles müesse usruhmä und uspacke - uf das händ mir nach däm stressigä Tag würkli kei Bock meh gha... Aber glücklicherwies simmer verschont wordä und dr Zöllner het eus ohni witeres dureglo - ufd Frog vo ihm, wo mir denn anewei het er denn nur erstuhnt gfrog "was wänd denn ihr in Skandinavie? - Wänd ihr go fischä??"

 

Nach öpe 1.5 Stundä isch scho s'erste Problemli utaucht... d'Wassertemperaturazeig isch uf Null gheit - schnäll simmer uf e nöchste Parkplatz und händ das im Taschelampeliecht agluegt - Jedoch isch alles i.O. gsi, wahrschinlich hets eifach Luft im Wasserkreislauf gha wo denn d'Azeig kurz uf Null brocht het!! Okay, wider ab ufd Autobahn!! Denn isch eigentlich alles guet gange, ab und zue kurz e Pause zum euses Körperwasser go entleere. Do mir eus zum Ziel gsetzt händ Dütschland so schnell wie möglich hinter eus z loh, simmer in eim Stück duregfahre. Noch 9 Stund - also öpe am 11.00 am Morgä - simmer denn endlich kurz vor Hamburg gsi.

Do im Norde gälte anderi Verkehrsordnige wie bi eus. Plötzlich hett sich d Stross vor eus ufbäumt und mir händ in ere Autokollonna ahalte müesse. D Schiff händ Vorfahrt, au wenns nume e Müschterli vome Schiff isch!

Uf de Karte hämmer gseh dass es e Stross git, wo durchs Meer dure goht. Da hämmer eus nid wirklich vorstelle chönne also hämmer no de chlei Umweg in Kauf gno und sind denn von ere wunderschöne Landschaft beidruckt worde. S erschte mol uf eusere Reis am Meer - ab jetzt händ für eus d Ferie wirklich agfange!

Kurz vor dr Gränze uf Dänemark hämmer verzwiflet e Ikaufszentrum gsuecht wos Dosebier git - denn in Skandinavie isch s'Bier einiges tüürer wie in Dütschland. Irgendwie hets eifach i keim Ladä Dosebier geh, nur Pet-Fläschli. Abr mir händ nid ufgeh und witer gsuecht - schlussändlich simmer denn au würkli no fündig wordä und händ Dosebier gfundä! Aber eusi Freud über dä Erfolg het sich gli wider gleit - denn diä Dütsche händ sogar uf Dose Pfand... Jänu, trotzdäm isch es eus so no günstiger cho und darum hämmer au grad richtig zuegläng und 3 Kiste à 24 Halbliterdose gkauft. :-) Nach derä Shopping-Tour hämmer eus uf e Wäg richtig Gränze und denn richtig Insel Römö gmacht.

Nach 14 Stund und 1'200 KM Fahrt simmer uf em Campingplatz acho. Dört händ eus im Kiss sini Tante und si Onkel liebeswürdig empfange und eus zum z'Nacht iglade. Jedoch vor däm Vergnüegä hämmer no biz Arbet gha - mir händ ebe bi euserä Abreis nüt aständig verstaut in eusem Büssli, sondern alles eifach iglade und abgfahre... so händ mir halt denn no alles müesse umrumä und platzsparend verstaue!! Was gmacht isch, isch gmacht! :-)

Nach em z'Nachtässe (grillierti Lachsforelle und Hering, dezue Härdöpfelsalat) Simmer denn no e churze Obespaziergang go mache. Hinterem Zeltplatz foht e Heidelandschaft ah, wo zume Naturschutzgebiet ghört.

Am halb 11i ume isch denn so langsam d Sunne untergange und au langsam chli chüel worde.

Noch dem asträngende Tag (40 Stunde uf de Bei, bzw uf de Räder) simmer denn todmüed is Bettli gheit. De Goran obe Kiss unde (äähm also im obere und undere Bett natürlich!!! :o)