Für e hütig Tag hei mr eigentlich vorgha nomol uf däm Zältplatz z'übernachte, eifach dur e Tag es Usflügli z'mache und biz in dr Gegend umefahre. Wo mr denn aber gseh hei, dass es in dr "nöchi" e Gletscher git und somit das für e Tagesusflug nid würkli rendiert, hei mr denn gseit mir fahre grad witer und cherä nüm uf Balestrand zrugg. Mir si denn losgfahre richtig Gletscherarm namens Nigardsbreen, wo e Teil vom Jostedalsbreen isch - Dä Gletscher isch dr grössti Gletscher uf em europäischä Kontinänt, er bedeckt e Flächi vo fascht 500 km2 und si höchsti Punkt isch fascht uf 2000 Meter über Meer obe!
Uf em Wäg zu däm Gletscher si mr öpe em Gletscher-"Bach" entlang gfahre, mir si denn mol kurz go e Pipi-Pause mache und hei mol nach dr Temperatur vo däm "Bächli" gluegt... i säg nur brrrrrrrrrrr, chalt isch anderscht. ;-)
Wo mr denn ind Nöchi vom Nigardsbreen cho si, het mä dä Gletscherarm scho vo witem gseh.
Mir si denn so nöch wiä möglich an Gletscher anegfahre und hei vo dört us das gewaltigä Ding betrachtet. Me het denn no chöne bis zum Gletscher anelaufe, aber denn hät me biz durs chaltä Wasser müesstä laufä- uf was mir nid würkli so Luscht gha hei. Es het denn aber zum Glück no e anderi Möglichkeit geh zum dört anecho, und zwar mit eme Böötli, wo me halt eifach het müessä zahlä. Laufe het me denn trotzdäm no e Stück müessä, do das Böötli nur öpe ind Hälfti gfahre isch - jänu, wenigstens hets keini chalte und nasse Füess geh. Im See vor em Gletscher het me es paar Iisbröcke gseh schwimmä, mir händ denn z'erscht e chliners Modäl wölle als Souvenir mitneh, abr lang hätte mr eus allwäh nid chöne dra erfreuä ;-)
Nochdäm mir denn wider zrugg zum Auto si und das ganze 40 Km langä Strössli wider zrugg hei müesse fahre, simmer denn kurz druf uf e Pass-Stross cho. Lut em Prospäkt isch es Nordeuropas hochsti und öpe idruckvollsti Pass-Stross. Und es isch würkli idrücklich gsi, ei Hoornodelkurve nach dr anderä - ganz schmali Strössli - und steil isch es ab und zue gsi, mir si fascht nid duruf cho mit eusem VW-Büsli - im 3. Gang het er ame nid möge, so simmer es Zytli im 2. Gang dörf ufe tukerlet. Wo mr denn gmeint hei mir si obe acho isch es denn abr no witer ufegange, und denn nomol witer. Es isch denn au zimli chüel wordä im Büsli, kei Wunder - dussä hets au ab und zue wider Schnee gha.
Bim abefahre si wider emol Schöfli uf dr Stross gsi, 2 Stück si gemütlich uf dr Stross gläge und es isch ihne so öpis vo egal gsi wnn d'Autos fascht nid näbedurä chöme. Kurz druf si mr denn no in Räge inecho - blöd, will mr bald emol e Zältplatz hei wölle ufsuechä, aber guet - will so s'Büsli wider emol gwäsche wordä isch :-) Jedoch si mr denn em Räge zum Glück doch no entcho. Mir hei denn im Städtli namens Lom no wölle e Chilleli go aluegä, vo däm mir ghört hei, dass es sau schön muess si. Aber mir si denn grad z'spoht gsi, dr Herr mit em Schlüssel isch eus grad bim anelaufe entgegächo. Jänu, so hei mrs halt biz vo usse agluegt und si denn witers zum e Plätzli zum übernachte go suechä.
