Schön usgschlofä, e prüefendä Blick öb no alles do isch (het jo schliesslich Pole uf em Camping gha) hei mr no biz z'mögelet und hei wider wiä immer alles ipackt und verstaut und hei eus uf e Wäg gmacht richtig Nordä. Dr Goran isch gfahre und dr Kiss isch dr Chartäläser gsi... Dr Kiss het ganz schmali Bärgströssli usgsuecht. Z'erscht isch es no über ä eispuhrigi Brugg gange wo mit Amplä glöst gsi isch.
S'Wätter isch am Afang nid bsunders gsi, es isch bewölkt gsi - het aber denn im Lauf vom Nomittag widr ufgmacht und d'Sunnä het sich biz zeigt. Natürlich hei d'Tunnel und Fährene uf derä Fahrt au wider e wichtigi Rolle gspielt. Mir händ s'erschte mol würkli müesse uf e Fähri warte - bis jetzt si mr immer zur richtigä Zyt anegfahre, so dass mr öpe grad ufd Fähri hei chöne go.
Nach öpe 200 Km Bärgströssli, entlang vo verschiedenä Seeä und Wälder si mr denn ame Ort acho wo mr eus während dr Fahrt zum Ziel gsetzt hei - dr Ort heisst Balestrand und lit am Sognefjord - das isch schins dr grössti Fjord (Meeresarm) uf dr Wält, ganzi 204 Km lang und an siner tiefstä Stell misst er über 1300 Meter. Im Johr 2004 isch dä Ort vo National Geographic Traveler zum beste Reiseziel kürt wordä, vo 115 internationale Reiseziel unter dä Kriteriä Natur, Kultur und Umwältschutz.
Mir hei denn e Campingplatz im ADAC-Campingfüehrer gfundä wo no ganz guet dönt het. Uf em Wäg dört ane si mr ame ganz chline Zältplatz durecho, wo öpe nur 1 Zält gstandä isch. Mir si denn aber trotzdäm witer uf dä ander Camping - jedoch isch dört d'Rezeptionischtin vorusse ghockt und het telefoniert... und si het eifach nüm wölle ufhöre (i derä Sach si d'Fraue do Obe allwäh glich wiä bi eus) ;-) Nach eme Zytli hei mr denn beschlossä mol dr Platz genauer go aluege, in dr Hoffnig diä liebi Frau isch denn fertig mit telefonierä! Jä denkste, wo mr zrugg cho si isch diä immer no am quatschä gsi und het au nid dr aschin gmacht, wiä si gli würd wölle ufhörä. Tja, allwäh gilt für diä s'Sprichwort "Der Kunde ist König" nid würkli. So hei mr denn gfundä mir fahre wider ab und suechä e anderä Camping. Wo mr denn zrugg ufd Stross cho si, hei mr 3 jungi Mädels gseh stöpplä - sozial wiä mr si, hei mr se natürlich au mitgno und sogar heigfahre. ;-)
Do denn doch scho langsam rächt spoht gsi isch und mir nüm gross Luscht gha hei zum verschiedeni Zältplätz go suechä usw., hei mr eus denn entschlossä mir gönge uf dä chli härzig Platz wo mr bi dr Afahrt gseh gha hei. Das hei mr denn au gmacht und heis nid bereut - das Plätzli isch vo Bärge umstellt gsi und me het e Wasserfall gseh. Viel Lüt hets au nid gha, aso tip top für eus.
