Leider hei mr hüt nid chöne usschlofä, do mr am 10.00 d'Wöschmaschine gmietet hei. Es het also e Wäschtag, bzw. -morgä ghe! Während däm eusi Chleider ihri Rundenä in dr Wäschtrummel gmacht hei, si mir go Minigolf go spielä. Dr knappi Sieger isch dr Goran gsi!
Nach em Wösch holä und versorgä isch es denn wider on the road gangä. Mir hei e rächti Strecki vor eus gha, denn euses Ziel isch Stockholm gsi. Mir hei denn no beschlossä, dass mir für 2 Nächt in es Hotel gönge - do 1. d'Zältplatz in dr nöchi vo dr Stadt nie toll si und 2. will mir denn nid mit dä öffentliche Verkehrsmittel müesse umefahre und so au nid scho früeh müesse hei will dr letscht Bus, Zug oder Tram fahrt. D'Fahrt uf Stockholm isch über e autobahnähnlichi Hauptstross gange, sehr befahrä und nid sehr schön - drum hei mr au nüt gfötelet. S'einzig wo mir uf derä Fahrt no festghalte hei isch e Coop - genau, au im Nordä gits Coop. Mir si scho oft an ein verbi gfahrä und hei gseit so ein müesse mr denn au no fötelä. Jedoch hei mrs glich immer widr versift. Mir si zwar niä ime Coop do Obe go ichaufä, abr es au e Läbensmittelladä. S'Logo isch aber nid ganz glich wiä in dr Schwiz.
Wo mr denn richtig Stadt cho si, hets rächt Verkehr gha - isch dänk au grad öpe Füürobezyt gsi. Zum Glück het eus öper e Tip geh in welli Richtig mir sölle, also wos am "schönste" isch. So hei mir denn dä Stadtteil chöne afahre. Aber es isch nid so eifach, denn plötzlich isch nüt meh agschriebe und me weiss nüm wo durä - und denn hets natürlich au no so viel Verkehr müesse ha. Mir händ denn eifach neumä an dr Stross parkiert und si z'Fuess witer - ändli hei mr denn au e Hotel gfundä, was aber usbuecht gsi isch (und allwäh au biz zu nobel für eus). Mir händ aber denn dört e Stadtplan becho und dr Herr vo dr Rezeption het eus es paar anderi Hotels izeichnet. Mir hei denn aber e Touriste-Center uf em Plan entdeckt und si mol dört ane. Dört hei mr denn au es Hotelzimmer (möglichst günstig und möglichst nöch vom Zentrum) buecht. Im Hotel acho hei mr denn grad emol z'erscht testet öb mr Internet hei und denn hei mr mol eusi Reisebricht afo ufeladä.
Mir si denn logischerwies no biz ind Stadt go s'Nachtläbe go gniessä! Mir händ au do es paar Tips becho wo mr sölle anego, diä Tips hei mr denn au befolgt und so simmer denn ines paar verschiedeni Bars usw. öpis go trinkä! Am Schluss si mr denn no biz inere Rockbar (Medusa) hänge bliebä - diä isch ächt cool gsi. Müed und öpe betrunken hei mr denn eus irgendeinisch uf e Wäg richtig Hotel gmacht.