Wie jede Morgä simmer no kurz aneghöcklet zum langsam richtig wach z'wärde, es het sogar widr emol e Kaffi geh und nid Budgetbull ;-) Mir hei eus denn richtig Schwedä gmacht, si jedoch nid uf dr Hauptstross bliebe, sondern si immer widr uf irgend e Näbeströssli gfahre. Au überd Gränze si mr denn au uf so ere Näbestross - mir hei an dä Strosseschilder gmerkt, dass mr müesse in Schwedä si. Diä si nid rot/wyss, sondern rot/gäl! Diä Näbestrosse si nid mol bsunders schmal gsi, eher im Gegäteil - nur si si öpe leer gsi, ganz sälte isch eus widr emol es Auto entgegä cho. Lustig isch no gsi, dass d'Stross rötlich gsi isch. D'Landschaft isch au super gsi, d'Bäum (Föhre?) hei zimli wit ufä nur e kahlä Stamm gha, so het me au wit in Wald inegseh. Aber leider het das au nid glängt und mir hei immerno kei Elch gseh :-(
Nach eme Zytli uf denä unbefahrenä Strosse, hei mr gmerkt dass mr gli emol sötte tanke - jedoch au scho lang kei Tankstell gseh hei. So simmer denn wider emol uf e Hauptstross, do isch d'Chance uf e Tankstell halt scho einiges grösser. Nach em Tanke si mr denn aber grad wider ab dr Hauptstross uf e Näbeströssli. Das isch z'erscht zimli ähnlich gsi wiä das vorhär, jedoch hets plötzlich ine Schotterströssli gwächslet - eus het das grad an eusi Rallye-Games uf dr X-Box und Playstation erinneret. Nur hei mr natürlich nid eso chöne fahre - leider! ;-)
Langsam hei mr denn widr müesse wäg eme Campingplatz luege - mir hei dänkt mir luegä hüt biz früehner und fahre denn es paar ab, damit mr au würkli e guetä hei und wenn möglich ein mit WLAN (Internet). Dr ersti isch voll in dr Stadt gsi und scho vo witem het me gseh, dass dä sehr voll mit Wohnmobil isch - drum simmer denn au grad witergfahre, dr zweit isch biz usserhalb gsi ame See - aber nix mit Internet, also witer! Denn si mr zu eim grad näbe äme Sportplatz cho - me het dört no Skisprungschanzenä gseh - aber dä het eus au nid passt. Denn si mr halt wider witer (es het i däm Momänt eh grad grägnet, so dass mr eus gar nid hätte chöne irichte). Dur schmali Strössli si mr denn witer und in diä nöchst grösseri Ortschaft, Borlänge, dört hämmer denn en rächt noble Camping gfunde (4-Stärn) - jedoch leider au ohni Internt. Aber dört si mr denn bliebä!
