Am Morgä isch es widr emol so richtig warm - scho fascht heiss gsi. Glich hets no glängt zum usschlofä. Nach em wach wärde bim Kaffi-Ersatz namens Budget-Bull hämmer denn dänkt mir warte no mit eusem Strandtag, denn es isch grad öpe Mittagszyt gsi und eifach zu heiss. So hämmer denn eifach biz dr Schatte gsuecht und händ biz relaxt. Am Nomitag hämmer denn eus schön brav icremt und si diä müehsame 50 Meter zum Strand gloffä ;-) S'Wasser isch aber sehr sehr chüel gsi, drum hämmer denn lieber eifach biz gsünnelet. Bim 2te Versuech ins Wasser z'go het dr Kiss gli wider mol richtig Badtüchli kehrt und dr Goran hets denn doch no gwagt und isch ins Wasser... Doch nach es paar Minute und einere Rundi Schwimmä het er denn au wider s'Badtüechli heimgsuecht.
Mir si denn no bis am Obe am Strand gläge und hei d'Sunnä gnossä. Erscht wo denn langsam es Hüngerli ufcho isch, simmer widr zrugg zu euserä "Wohnig" und händ afo chochä. Do irgendwie alles süess schmeckt in Schwedä und Norwäge (Salatsauce, Sänf, usw) hei mr e Fläsche Essig gkauft zum eus e aständigi Salatsauce chöne mache. Das het au wunderbar klappt und so hei mr denn au richtig guet g'ässe.
Zimli kaputt vom Umeliggä am Strand hei mr denn no gemütlich e DVD (Scarface) vorusse gluegt und händ dä Muggä dr Kampf agseit - mit Händ und Füess hei mr eus gwehrt. Eusi Anti-Muggä-Sprays händ ebe nid so gwürkt wiä mr das eus gwünscht hätte. So uf diä 1 si mr denn go schlofä, do mr am nöchste Tag möglichst früeh hei wölle abfahre zum 1. an euses nöchste Ziel (Lysefjord) z'cho und 2. widr emol euses Wasser vom Büsli neumä chöne go wächslä und 3. ändli widr mol neumä Internet z'findä, zum eusi zahlriche Bricht chöne ufelade.