Farsund N zum Lysefjord (20.07.2006)

Wiä vorgseh, si mr für eusi Verhältnis no früeh ufgstandä - öpe so am 9.30. Erstundlicherwis si mr nid mol verstochä gsi, obwohl während em Film luege öpe 100 Schnogä ins Büsli gflogä si. Nachdäm mir zimli schnäll alles packt und verstaut hei, isch es widr witer ufd Stross gange. Me chunt do zwar nüm so schnäll vorwärts wie bispielswies in Schwedä, wills do eifach kei Autobahn git. Abr drfür gseht me so au öpis vo derä schöne Landschaft wo Norwäge z'bietä het! Mir si denn sogar nid mol uf dr schnällste Stross gfahre, sondern ägsdra so Bärgstrosse. Isch eifach traumhaft diä Gegend do.

Leider isch uf dr Fahrt plötzlich dr Akku vo dr Digitalkamera dundä gsi, zwar hei mr schono e anderi gha, abr mit derä isch es nid s'glichä. So hei mr halt einigi schöni Sache nid chöne fötele, abr mir wärde in de nächste Täg sicher no ähnlichi Gegände aträffe. Uf em einte Stück hets ab und zue Tier uf dr Stross gha, d'Schöfli hei mr no chöne fötelä, abr diä 2 kämpfendä Geissböck leider nid. Isch ächt no witzig gsi, diä 2 händ natürlich genau uf dr Stross müesse ihre Kampf usträge - so dass vo beidnä Sitä kei Auto het chöne durefahre und sich langsam e chline Stau bildet het. :-) Bi däm Kampf het sich dr eint uf sini Hinterbei gstellt und denn mit Schwung em andere e Chopfnuss geh - das het eus grad ans Chopfballgoal vom Senderos gegä Südkorea erinneret! :-)

Gegä diä 17.00 hei mr denn euses Ziel erreicht und si am Zältplatz am Lysefjord acho. Do mrs grad no vor em grosse Asturm uf e Zältplatz gschafft hei, händ mir ganz es schöns Plätzli für eus gfundä.

Zum erschte mol sit eusem Trip hei mr dänk, hüt chochä mr mol nid sälber und gönge ins Restaurant vom Campingplatz go ässe. Abr vorhär hei mr no eusi letschtä Reisebricht wölle ufelade, jedoch isch diä Internetverbindig nid würkli so schnäll gsi, drum isch das biz e längeri Aglägeheit gsi. Nach em Ässe und es paar vo denä ca. CHF 11.- Stange, si mr denn zrugg zu eusem Plätzli und händ dört no biz Bacardi-Cola drunkä.