Geirangerfjord nach Elverum (26.07.2006)

Schön usgschlofä und erholt vom letschtä Tag hei mr eus widr ans Abfahre gmacht. Mir si denn no go s'Wässer vom Büsli go wächslä und händ denn grad gseh, dass wider e neus Krüzfahrschiff chunt - no e grössers als das gestert. So hei mr euses Fahr- und Schlofmobil anegstellt und si das monstermässigä Schiff go beobachte wies aleit.

Denn hei mr eus widr on the road gmacht, isch jo schliesslich au e Roadtrip oder?! Mir hei denn s'letschtä Pass-Strössli vo derä Reis vor eus gha... Das isch au wider ganz spektakulär gsi, vo dr höchi Obe het me uf e Fjord abegseh, wo mir vorhär euse Campingplatz gha hei. Me het denn au nomol das grosse Schiff gseh, het super usgseh!!

Es isch denn widr witer gange, immer witer ufä. Uf dr höchi Obe hets denn au widr einigi Fläcke mit Schnee gha, abr chalt isch eus nid gsi. Vor dr Abfahrt het me au widr es rächts Stückli durab gseh, me het diä kurvärichi Strecki gseh wo eus no erwartet. Diä Abfahrstrecki isch au widr zimli äng gsi und natürlich sehr sehr kurvärich... si isch au anerä Stell vo eme Wasserfall öpe überquert wordä - mir händ denn grad no e chlini Morgäduschi becho ;-) Zum Glück het euses Büsli so e guetä Ischlag / Wändekreis, sunscht hätte mr no müeh gha zum um gwüssi Kurvä z'cho! Natürlich hets dasmol au widr müesse Tier ha wo d'Stross blockierä, dasmol isch es usnahmswis e Chueh.

Nach derä Pass-Stross isch es denn wider uf e Hauptverbindigsstross gange richtig schwedischi Gränze, diä isch nid würkli speziell gsi - drum gits vo do au keini Föteli. S'einzig speziellä uf denä ca. 400 Km isch no Durchfahrt bi Lilehammer gsi, me het vo derä Stross us no einigi Sache gseh vo 1994 - denn händ dört nämli diä Olympischä Spiel statt gfundä. Kurz drnoch si mr denn ab derä Stross und si no kurz go ichaufä und denn go es Plätzli zum Übernachte suechä - mir händ denn e zimli leerä Campingplatz gfundä wo nid grad so uf em neustä Stand gsi isch, und er het nur 2 Stärne gha. Jänu, für 1 Nacht längt das jo. Mir si denn kurz nach dr Akunft vo eme kurzä Gwitter "überrascht" wordä, dr Kiss isch glücklicherwis grad fertig wordä mit dr Reparatur vom Netzteil / Ladegrät vo eusem Büsli und mir händ grad no vorhär euses Vorzält chöne ufstellä und gemütlich drunter höcklä! Ca. am 23.30 hämmer denn no biz Badmington gspielt und si denn laaaangsam go pfüserlä.