Nach erä eher kürzerä Nacht und biz verkateret hämmer eus wider startklar gmacht si ufd Autobahn richtig Oslo (Norwäge), jedoch simmer nid diä ganz Zyt uf dr Autobahn bliebe, sondern si neumä drab und si biz uf schönerä Strössli witergfahre... es het richtig tolli und kurverichi Strössli gha - wiä gärn hätte mr denn eusi schnällere Autos drbi gha! ;-) Eher ungeplant hämmer denn neumä statt dr erwartetä Brugg müesse, bzw. dörfä uf e Fähri!
Denn simmer biz an verschiedäne Seeä duregfahre und si einisch widr ufd Autobah, aber diä isch denn gli einisch fertig gsi und denn hämmer müesse uf ere 1 spuhrigä, ab und zue sogar 2 spuhrigi Stoss richtig Oslo witerfahre. Nach ere kurze Tank- und Ässpause hets denn e Fahrerwächsel geh und witer isch es gange - über d'Gränze uf Norwäge und denn bi Moss uf d'Fähri uf Horten!
Als nöchsts Übernachtigsziel hämmer e Stadt namens Larvik agfahre. Dört hets uf dr Charte mehreri Zältplätz izeichnet gha... so hämmer denn au mol eine agfahre, jedoch isch nid würkli so toll gsi. Alles Dauercamper und ei Wohwage am anderä - si händ eus denn wölle so e Abstellplatz geh am Strosserand. Nid würkli glücklich hämmer denn das glich agno (will es ebe Internet geh het). Jedoch bevor mr denn alles uspackt händ, hei mr das Internet wölle teschtä und händ gmerkt dass mir e Benutzername und e Passwort bruchä - okay, gömmer mol nach däm go frogä - denn händ si gseit, dass si umgrächnet CHF 50.- für e Internetzuegang fürs ganze Weekend wei!! Denn isch es eus z'viel wordä und mir händ eus wider abgmäldet... Nid grad sehr motiviert simmer diä anderä Zältplätz go besichtigä, öpe jede het glich beschissä usgseh - immer diä dichbesiedeltä Plätz mit alles Dauercamper und kei Platz für eus!!! Mir si denn öpe ca. 5 Zältplätz abgfahre und denn hets no ein in dr nöchi gha ame See - okay, letschti Chance, falls dä nüt isch gömmer neumä in Wald!! Das isch euse Beschluss gsi! Aber sowiet isch es denn nid cho, dä letschti Platz isch sehr sympathisch gsi, wenig besiedlet und sehr schön gläge!! Und au d'Dame an dr Rezeption isch viel fründlicher gsi als diä Lüt bi de andernä Plätz!! Aber bevor mir denn händ chöne uf e Platz fahre und uspacke hämmer no Gäld brucht, also nomol zrugg fahre und e Bankomat suechä - aber dä hämmer denn schnäll gfundä und händ ändli chöne go uslade, anehöcklä und öpis grillierä. Mir händ denn au grad no e Nochber becho, wo vo Bärn gsi isch - Do er nid viel zum z'Nacht drbi gha het, hei mir ihn denn grad iglade. Do er vo dr andere Sitä wiä mir cho isch, het er eus es paar Sache chöne empfehlä - zum Bispiel e Zältplatz mit Sandstrand!! Gli emol simmer denn aber go schlofä (au wenns dört am 12i z'Nacht noni dunkel gsi isch).
