Am nöchste Morgä, dachdäm eus wider emol einisch meh d'Wärmi vo dr Sunnä gweckt het hämmer ändlich wider emol e gemütlichs Tägli vor eus gha - denn mir händ beschlossä, wider emol e Tag neumä z'verbringä und nid wie sunscht öpe immer witerfahre. So si mr denn biz an See hinterem Zältplatz und händ diä schöni Ussicht gnossä! Eigentlich hämmer no biz witer am Ufer entlang wölle laufe, do es würkli ganz schön gsi isch - aber dr Kiss het plötzlich e laufendä Zäch uf sim Bei entdeckt und het nur no zrugg wöllä!
Mir händ denn biz uf em Zältplatz relaxt und hei unter anderem no Fäderball und Mühli gspielt. So gegäne Obe wo denn es Hüngerli ufcho isch hei mr beschlosse, dass mir Pasta al pesto möche!! Okay, teschtä mr also zum erste mol eusi Chuchi im Büsli... leider isch d'Pfanne nid ganz grad gstandä (chas halt geh, wenn me uf ere Wiesä parkiert) und so isch denn genau wo d'Pasta "al dente" gsi isch, diä ganz Pfanne am Bode gheit... alli Hörni und s'ganze Salzwasser uf eusem "Wohnigs"-Teppich!!! Jä super :-/ Okay, hämmer halt e ungeplanti Putzaktion müesse starte und denn nomol neu afo chochä!! Und bim 2te Versuech hets denn au klappt, obwohl d'Pfanne fascht nomol abegheit isch!!
Für e Räscht vom Obe (bi euch ind dr Schwiiz scho Nacht) hämmer eus mit dr Dame vo dr Rezeption und ihrer Cousine verabredet! Mir si denn kurz zu ihre hei, si het grad in dr Nöchi gwohnt. Und zwar voll im Wald inne, nur ihres und es anders Hüsli. Ächt sau schön! Nach ere kurze Huusbesichtigung simmer denn ins nöchste Städtli "öpis" go drinkä!