Larvik N nach Farsund N (18.07.2006)

Usgschlofä und fascht scho wider völlig nüechtern simmer ufgstandä und händ mol e schön chüels Budget-Bull drunkä. Denn s'erste mol uf däm Road-Trip go rasierä, vo 3-Tagesbart het me do nüm chöne redä. ;-) Nach em Duschä und em Züg verstaue simmer denn no kurz em Meitschi vo dr Rezeption go adé säge und si richtig Kristiansand (nöchsti grösseri Stadt) gfahre zum go Gäld holä und für diä nöchste Täg go ichaufä.

Denn isch es witer gange uf derä Hauptverbindigsstross wo me höchstens 80ig darf fahre und meistens nur 1 Spuhrig isch. Denn hets natürlich au öpe all 2 Km e Radarchastä... Mir händ eus no gfrogt, öb ächt jedä vo denä au würkli aktiv isch! Aber teschtet hämmers denn glich nid ;-) Euses nächste Ziel isch e Zältplatz unterhalb vom Städtli Farsund (südwestlich in Norwäge) gsi. Nach eme Zytli hämmer denn mol ufd Charte gluegt wiä lang es öpe no goht und händ müesse feststellä, dass mr vorerä Ewigkeit hätte sötte uf e anderi Stross abbiegä... Mir si denn halt vo us ere andere Richtig uf das Farsund gfahre! Es isch ganz e speziells Strössli gsi, öpe e Passströssli - kurverich und sehr sehr schmal! Aber d'Umgäbig isch sehr idrücklich gsi, eifach dr Hammer... Mir si grad froh gsi, hämmer eus verfahre und si uf das Strössli cho!!

Denn öpe am 19.00 Uhr simmer denn doch no uf däm Zältplatz, wo eus dr Philipp us Bärn zwei Täg vorher empfohle het, acho. Mir händ Glück gha und grad no es schöns Plätzli im Wald verwütscht. Öpe 50 Meter hinter eusem Plätzli hets e schöne Sandstrand am Meer! Mir händ eus denn für dr nöchst Tag e Bade-Tag vorgno. S'einzigä wo eus uf däm Camping-Platz nid so gfalle het, si d'WC's und d'Duschenä gsi - diä händ scho biz z'wünsche übrig glo... Jänu, me cha halt nid alles ha - nid wohr?! Und es isch jo nid für ewigs. Am spötere Obe simmer denn no mit es paar Bierli an Strand führä ghöcklet, aber in dr Nacht isch es do scho rächt chüel. Also hets nur no eis geh - ab in warme Schlofsack! ;-)

Die Foti vom Strand hämmer öppe am halb 12i z Nacht gmacht, es isch denn wirklich no so hell gsi, isch kei Langzitbelichtig!

Do no d Variante mit Langzitbelichtig (4 sek)