Vom Räge verschont si mr nach em lange usschlofä ufgstandä und hei eus nach emä Zytli richtig Trelleborg gmacht. Dört gits ebe e Fährverbindig nach Dütschland (Travemünde), und so ei Fähri hei mr für e Mittwuch wölle buechä! Mir si denn öpe uf em diräkte Wäg dört anegfahre, so dass mr im Fall dass alles usbuecht isch grad chöne witer zu erä anderä Fährverbindig oder eus halt mit eusem Büsli über Dänemark richtig Dütschland möche.
Mir si denn scho kurz vor 14.00 in Trelleborg acho und hei diä gwünschti Fährverbindig becho, sogar no e Ussäkabine hei si für eus gha! S'nöchste Ziel isch e Campingplatz gsi für diä letscht Nacht in Schwedä. Uf dr Fahrt an dr Küste entlang um Trelleborg ume hets saumässig gstunkä, glaub s'Meer het scho lang kei Duschi meh vo innä gseh... Und e Zältplatz an dr Küste und diä ganz Zyt dä gstank ha? - nei danke! Mir si denn öpe e halb Stund Autofahrt vo Trelleborg e Camping go aluegä, er isch ganz ok gsi - eher biz e noblerä. Und natürlich s'wichtigst, dört hets nid gstunkä! Mir hei denn mol einigi Sache usgladä und hei eus richtig Städtli gmacht (hei jo no e Champis müesse ha do jo 1. Auguscht isch!!!) Nur isch das in Schwedä nid so eifach mit alkoholischä Getränk, imä normale Supermarkt gits zwar scho au Bier, allerding höchstens mit 3.5 vol! Mir hei eus denn erkundigt, wo es denn so e speziellä, staatlichä Alkoholladä git - zum Glück hets grad eine geh in dr nöchi, dä hei mr denn natürlich grad mol ufgsuecht. Wo mr dört inecho si, simmer scho grad biz sprochlos gsi. Me het in Glaskäste diä verschiedenä alkoholischä Getränk usgstellt, dört stoht au dr Pris und e "Artikelnummerä". Vornä hets öpe 5 Kassenä gha wo me sini Bstellig het chöne ufgeh - jedoch het me z'erscht müesse e Nümmerli zieh und warte bis me an dr Reihä isch (so wiä bi eus in dr Stadt uf dr Post). Wenn me denn dra cho isch, het me sini Bstellig abgeh und dr Kassier isch nach hindä verschwundä und het eim diä gwünnschtä Getränk gholt. Rächt ungwöhnlich für eus Schwizer ;-)
Zrugg uf em Camping hei mr denn zum letschtä mol dr Grill agworfä (es isch genau ufgange mit dr Kohlä) und hei z'Nacht gässe. Wo mr denn gseh hei dass sich dr Himmel zimli verdunklet und immer nöcher zu eus chunt hei mr alles afo ins Büsli packe und hei eus denn no e DVD inezoge und natürlich uf e Geburtstag vo dr Schwiz agstossä ;-) Es het denn zimli afo gwitterä, mit allem drum und dra. Mir si denn gli emol go schlöferlä, do mr jo am nöchste Morgä scho öpe am 07.30 müesse ufstoh, do mr spötischstens am 9.00 müesse go icheckä für ufd Fähri!