Lom zum Geirangerfjord (25.07.2006)

Euses hütigä Ziel isch nid so wit wäg gsi wiä süscht. Mir händ nur ca. 80 Km vor eus gha. Am Afang isch es nur es bizeli ufä gange, drfür denn öpe 3-fach abe, widr e richtigi Pass-Stross. Aber mir hei jo Zyt gha, händ also euses Büsli nid gross müesse quäle und hei gemütlich mit dr Motorbräms (2tä Gang) chöne abefahre.

Kurz bevor mr im Tal undä gsi si hei mr gmerkt, dass es do rächt viel Touristä het. Es het einigi Reisecar untewägs gha und natürlich au vieli Wohnmobil. Uf eimol hei mr denn vo eme Strössli abe uf e Geirangerfjord gseh und dört isch e riese Krüzfahrschiff gsi. Eus isch dä Ort ebe us däm Grund empfohlä wordä, do dört schins öfters so Monsterschiff aleget.

Wo mr denn i däm Kaff undä acho si het me öpe nur Touriste gseh, es isch uf dr Stross au nur 30 Km/h erlaubt gsi. Mir händ denn dr Zältplatz ufgsuecht und eus igrichtet. Denn het das grosse Schiff afo hupä und das het i däm Tal ghallt wiä nüt anders. Me het denn vo witerhär nomol so es Hupä ghört, es isch aso nomol so e Schiff im amarsch gsi. Mir si denn au mit eme Bierli ans Wasser ane gange zum eus das us dr Nöchi go aluegä - es isch erstuhnlich wiä nöch am Ufer diä riesä Schiff vor Anker gönge. Nach em stuhnä und beobachte si mir denn au biz ins Städli gange wo voll vo Souvenir-Shops gsi si - do jo mir sälber au Touriste si, hei mr halt au biz öpis igkauft ;-) Mir hei eus e tolle Chläber für ufs Büsli (scho dr zweit) und je 2 T-shir gkauft.

Wo mr denn wider zrugg uf e Camping-Platz si, hei mr eifach widr emol biz relaxt und d'Sunnä gnossä. Obwohl mir jo nid lang unterwägs gsi si, si mr beidi grad mol uf eusnä Camping-Stüehl igschlofä! Nach em Badmington spielä isch denn das grösserä Schiffli abdampft... natürlich widr mit eme Hupkonzärt à la surprise! Viel hämmer denn au nüm gmacht usser öpis uf e Grill gheit und eus es paar Bierli gnähmigt.