Wanderung zum Preikestolen (21.07.2006)

A däm Fritigmorgä hämmer eigentlich biz früehner wölle ufstoh wie sunscht, aber denn isch es halt biz spöter wordä - erst am 11.30 simmer ufgstandä! Das mol hämmer halt so e schöns Schatteplätzli gha, drum het eus d'Sunnä am Morgä nid chöne weckä... Zwar hüt hei mr jo gar kei Sunnä gha, denn es isch bewölkt gsi! S'idealä Wätter für e Wanderig - was mr jo au vorgha hei. Tip top! Nach em Sandwich mache und Getränk ipacke simmer losgfahre richtig Parkplatz bim Start richtig Preikestolen.

Für diä wo nid wüsse was dr Preikestolen isch, do e chlini erklärig: Es isch s'bekanntischtä Felsplateau in Norwäge. Das Plateau ragt in 600 Meter Höchi übere Lysefjord und isch öpe 25 mol 25 Meter gross. Im Johr wanderä ca. 90'000 Tourischte uf dä Ussichtspunkt. Dr Wanderwäg erstreckt sich über ca. 4 Km und me brucht so gegä 2 Stund pro Wäg. Dr Wäg isch sehr steinig und teilwis sau steil. Aso unbedingt guets Schuehwärk montierä, mit Badschläppli het me meh als verlorä ;-) Und wenn me Höheangscht het (wiä dr Kiss) isch es au nid unbedingt empfehlenswärt. Aber sunscht muess me eifach mol dört gsi si, öpis verglichbars gits allwäh sälte neumä.

Für e Parkplatz muess meh 60 Kronä (CHF 12.-) zahle, abr mir hei dummerwis nur no Münz vo 54 Kronä gha. So händ si eus doch no uf dä Parkplatz glo. Und d'Wanderig het chöne startä.

Nach däm müehsamä Ufstieg isch me vo ere fantastische Ussicht überä Lysefjord belohnt wordä.

Nach em picknickä und einigä Föteli hei mr eus nach ca. 1.5 Stund widr em Abstieg gwidmet. S'erschte Stück hei mr e anderi Route gno, wo denn öpe im oberä Drittel wider mit dr anderä Strecki zämme cho isch. Kaputt und schweissgebadet simmer denn nach 1.20 Stund undä acho und hei eus mega ufd Duschi gfreut gha.

Fuessnote vom Kiss:

Rein vo de Landschaft und de Ussicht her gsehe isch es mega schön gsi! Aber ich chas leider nid witerempfehle während de Hauptsaison dört ue z kraxle. Zum Teil isch es mega müehsam gsi, im Gänsemarsch dört ue, me hett immerwieder warte müesse will Lüt entgege cho sind, immer irgendwelchi Lüt überhole oder verbi loh. Leider isch es viel zu touristisch :o(