Vom Lysefjord nach Bergen (22.07.2006)

Leider hei mr nach euserä Monsterwanderig nid wiä agno bsunders guet gschlofä - irgendwiä hei mr beidi diä 2 Nächt uf däm schöne Zältplatz nid so guet chöne schlofä wiä sunscht!? Jänu, für es paar Stündli hets ämel glängt. Wo mr am Morgä ufgstande si, hei mr müesse feststellä, dass es bizeli nass wordä isch dussä über Nacht! Isch aso dr richtig Zytpunkt gsi zum eusä Trip witerfüehrä. Als Ziel hei mr dasmol d'Stadt Bergen an dr Westküste gha - das Städtli isch eus vo verschiedenä Lüt empfohlä wordä. Aber z'erscht hei mr no müesse go ichaufä, damit mr au öpis zum Ässe hei! Am Afang isch es bewölkt gsi, aber denn hei mr denn plötzlich doch no d'Sunnä gseh - sind also anschinend in diä richtig Richtig losgfahre!

Wiä immer isch es über ganz verschiedeni Strossä gange, eimol Hauptstrosse, denn wider irgendwelchi schmali Bärgströssli oder halt uf erä Fähri. Uf däm Wäg hei mr s'längste Stück uf ere Fähri bis jetzt gmacht, ca. 1 Stund isch diä Fahrt gange. Während derä Stund hei mr eus grad no chöne go verpfläge mit Pizza und Sandwiches, so e richtigi Fastfood-Mohlzyt... tip top ;-) Lustig si no diä Tunnel (uf norwägisch: Tunnelen) wo me so atrifft, me meint me fahrt durch e grossi Tropfsteihohli - d'Innewand vo de Tunnel si us Naturstei und es isch zimli füecht und chalt dört inne. Sehr speziell isch no, dass diä Tunnel öpe nid belüchtet si - nur ganz wenig Liecht, und wenn me mit em Färnliecht fahrt gseht me wenigstens wos durä goht, do es am Rand so reflektierendi Pföstli het.

Obwohl sich d'Natur immer wider biz änderet, fahrt me do meistens äntwäder an dr Meeresküste oder halt an irgendwelchä Seeä oder Fjords wo vo Bärge umgeh si, durä. Ab und zue chunt wider e Tunnel, e Brugg oder e Fähri.

Müend entschuldigä wenns uf gwüssä Föteli so Fläcke het, abr mir düend halt oft dur d'Windschutzschibä fötelä und diä isch halt mitlerwilä rächt voll Protein (Insektä).

Denn kurz vor eusem Ziel in Bergen hei mr afo Zältplätz suechä und hei eifach kein gfundä, so simmer denn eifach mol dur d'Stadt duregfahre und uf dr andere Sitä go luegä. Mir si denn au fündig wordä, abr würkli schön oder sympatisch isch dä nid gsi. D'Stellplätz für d'Wohnmobil usw. isch uf eme Steibodä gsi und dr Zälplatz isch voll vo Ängländer und Pole gsi... Jänu, zum schlofä längts jo! Mir händ denn no es paar Bierli gno und si denn mit em Bus richtig Zentrum. Mir si denn z'erscht emol em Hafe entlang gloffä wo im Wasser voll vo Yachte und uf dr Stross voll vo tüüre Autos gsi isch. Irgenwiä hei do alli müesse zeige was si hei. Au mol luschtig so öpis live z'gseh. Mir si denn an verschiedenä Ort öpis go trinkä und si bis am 0:15 (denn isch ebe dr letscht Bus gfahre) in Bergen bliebä.

Bim Heilaufe vo dr Busstation richtig Zältplatz hei mr no es Päärli kennä glehrt, sie isch us de USA gsi und er us Dänemark. Mir hei se denn no zu eme Bierli zu eus iglade und hei so dr Obe, bzw. d'Nacht lo usklingä.