Nach em Usschlofä hämmer kurz öpis z'mörgelet und händ euses Züg iglade und si mol losgfahre - mir si jedoch nid grad ufd Autobahn, sondern uf normale Strössli richtig Nordä gfahre bis in diä nöchst grösseri Stad (Ängelholm), dört hei mr denn e Bankomat gsuecht, do mir jo no gar kei schwedischs Gäld gha händ. Und will mr grad in dr nöchi vo eme Supermarkt gsi si, händ mr denn grad no biz ikauft!
Denn isch es witer gange uf denä Strössli bis uf Hovs Hallar, das isch in dr Charte als Ussichtspunkt vermerkt gsi.
Nach däm Halt simmer richtig Autobahn. Mir händ als nöchstes Ziel Göteborg gha, denn es isch Samschtig gsi und drum hämmer dänkt mir wänd ine Stadt go s'Nachtläbe erkundä. Nachdäm mir e Zältplatz (biz e komischä, Stadt halt) gfundä hei und mit eusnä dütschä Nochberä biz pläuderlet händ, simmer denn au mit em Tram ins Zentrum vo Göteborg. Natürlich hämmer denn grad emol müesse diä halbi Stadt z'Fuess durchquerä zum luegä was es so alles git. Per Zuefall hämmer denn Musig ghört und sind emol däm rockigä Sound entgegä gloffä, mir händ denn so e Security gfrogt wäge Tickets, abr leider isch es usverchauft gsi... Drum simmer eus denn halt neumä ine Bar (dusse verstoht sich) es Paar Drinks go gnähmigä - und spöter simmer no ine anderi Bar, oder Pub wo mr händ müesse Itritt zahle und au Sound vo eme DJ gloffä isch - dört hämmer eus denn zu es paar schwedischä Mädels gsetzt und händ biz mit denä pläuderlet. Natürlich hämmer denn no es paar Drinks und Bierli zu eus gno, schliesslich isch jo au Samschtig gsi ;-) Für e Stange hämmer dört ganzi CHF 10.- zahlt!!! Lustig isch au no, dass d'Schwedä im Usgang immer mit dr Visa-Charte zahle! So modärn si mr halt noni und händ drum au uf diä altmodischi Art zahlt, nämlich mit Bargäld!! ;-) Es Paar Drinks und Bierli spöter hämmer eus denn widr richtig Tramhaltstell gmacht und si zrugg uf e Zaltplatz go pfüserlä!!
