Noch der erste erholsame Nacht im Büsli simmer denn vo de Sunne gweckt worde, wo so ziehmlich igheizt hett.Ok, so früeh isch da gar nid gsi, nämlich scho öppe 10i ume. Also hetts gheisse Kaffi mache, d Joghurt us em Chüelschrank use neh und zmörgele.
Und denn endlich mol an Strand! Römö hett mehreri Stränd wo mer aber guet berote isch, mit em Auto oder Velo anezfahre. Z fuess wärs e halbi Wanderig bis zum Meer use. Chum isch mer über de letschti Daich, eröffnet sich de kilometerlangi Sandstrand. Mir sind denn chli im Meer entlanggloffe und händ d Füess chli Bädelet.
Nochdem dass denn alli Füess wider frei vo Sand gsi sind, simmer d Insle no chli witer go aluege gange, richtig Fischerhafe. Dört hämmer im e Fischlade feini Lachsbrötli kauft. Mhh die händ e eigeni Räucherei gha, da schmeckt halt scho anderscht als da abpackte Züg wo mer bi eus bechunnt. Aber s isch nid ganz gratis gsi, umgrechnet öppe 4.50 Fr, also öppe glichi Prise wie i de Schwiz. Da giltet eigentlich für öppe alles do in Dänemark, oder gwüssi Sache au chli türer. Benzin choschtet de Liter öppe 2.10Fr, e Büchse Bier 2Fr.
Do im Hafe gohts au uf d Fähri noch Sylt. Viel Lüt fahred do über Römö wills günstiger isch, isch jo schliesslich au d Nochberinsle. Me hett si denn au vom Strand us gseh. Uf dere Site vo de Insle hetts Sandbänk wo bi Ebbe Seehünd druff sünnelet. Leider isch grad Fluet gsi wo mer dört gsi sind und me hett nume es par Vögel beobachte chönne.
Am Obe simmer denn über euse Rätschsatz froh gsi! D Türe isch nümm rächt ufgange. Also Werkzüg use, Verkleidig ab, Schloss use, repariere und wider zämemeche, neu istelle. Jetzt isch wider alles Tiptop! (vorläufig emol)
Wo denn alles widr gflickt gsi isch hämmer jo no mol öpis müesse ässe - wie chönts au anderscht si, mir händ grilliert! Aber dasmol kei Fisch, sondern Fleisch wo mr bim "Slagter" (Metzger) gkauft hei. Denn am Obe isch es langsam chüel wordä und mir händ mol eusi Jäggli müsse go suechä :-) Aber au mit däm händ mr nid würkli warm gha, dä cheib Wind isch eifach z'chüel gsi... brrrr! Drum simmer denn bi dä Verwandte vom Kiss ins Wohnmobil ghöcklet und händ Triomino gspielt.Wär gwunnä het gseht me uf em Föteli undä :-) Okay, dr Goran isch scho nid dr Sieger vom Obe gsi, aber er het - wiä au dr Kiss - 1mol gwunnä... Allerdings het dr Goran mit Abstand diä höchst Punktzahl vom Obe gschafft! *stolz*
Will mr do in Dänemark no kei Elch gsichtet händ (gits jo do au nid), bietä mir euch wenigstens mol öpis ähnlichs... und zwar e Plüsch-Elch ;-)
