Am Morgä hämmer gemütlich usgschlofä und denn hämmer scho langsam ans packe müesse dänke, do mir eus vorgno händ witer z'fahre. Aber für es z'Morgä-Ässe hets schono glängt! Nach em packe und alles reisetauglich verstaue simmer no euse Abwasertank go leerä und dr Früschwassertank go fülle... Während derä Zyt hei mir no euses Büsli biz verschöneret... Ufs VW-Zeiche hämmer e Schwiizerkrüz anekläpt. Schick, oder? ;-)
Nach däm mir "ready to go" gsi sind, hämmer no Proviant igkauft und händ no wölle tanke... was mr au gmacht hei. Nur mit em Zahle isch es nid so eifach gsi, mir händ s'erste mol müesse euse Pin-Code vo dr Visa-Charte benütze, und dä het nid funktioniert! Bargäld hämmer au keis gha... denn simmer dört gstande und händ nüm witer gwüsst. Unglaublich, aber wohr - per Zuefall sind im Kiss sini Verwandte au grad dört cho tanke, so händ si eusi Benzinrächnig chöne zahle!! Hei ei ei, das nennt me Schwein!! :-) Und um nid nomol ine söttigi Situation z'cho, hämmer denn e Bank in dr nöchi ufgsuecht, wo mir chöne biz Gäld useloh... Mir si denn ines Städtli namens Ribe gfahre und händ e Bank gsuecht, d'Strosse si biz äng gsi und drum simmer denn z'Fuess witer!! Das Städtli isch no rächt härzig und schön gsi, und es het sogar e Bankomat gha, wo dr Goran mit siner Postcard es paar Hundert dänischi Chrone het chöne useloh!
Es isch no witzig wiä alles agschriebe isch, irgend e Mix us Dütsch und Änglisch - me verstoht no viel, wenn me es paar mol aneluegt ;-)
So, ändlich hämmer eusi Reis chöne witerfüehrä - vollgas! ;-) Gli hämmer au e Autobahnaschluss gfundä, denn isch es öpe nur no gradus gange - quer dur Dänemark dure, das heisst 2 Insle mit jewils immer ganz speziellä Bruggä!! Uf denä 465 Kilometer hämmer eimol kurz e Päuseli gmacht, bevor mir denn diä eint riiiiiiiesä Brugg überquert hei. Uf denä Bruggä hets so öpis vo gwindet, dr Goran het richtig müesse kämpfe um uf dr Spur chöne z'bliebä!
Mir händ z'erscht nid gwüsst öb mr no 1 Nacht wänd in Dänemark verbringä oder grad uf Schwedä fahre - mir händ eus denn fürs 2te entschiedä!
Vor dr 2tä und letschtä Brugg, diä uf Schwedä, isch me z'erscht ine Tunnel ine wo durchs Meer füehrt und aschliessend isch me denn grad ufd Brugg ufegfahre und isch z'erscht fascht ebe mit em Meerespiegel gsi!
Diä Bruggeüberfahrt het me naütlich müesse zahle, und billig isch das nid... öpe CHF 40.- pro Brugg! Nach dr Zahlstell vo dr 2te Brugg isch grad dr Zoll vo Schwedä cho, e nätti schwedischi Zöllnerin (eusi 1. Schwedin wo mir do gseh händ) ;-) het eus gfrogt was mir drbi händ - uf änglisch natürlich - "alcohol?" YES! "tabac?" YES! "drugs?" YES (dr Kiss isch wideremol biz z'schnäll gsi, wahrschiinlich isch er vo dr Schönheit vo däm hübsche Meitschi bländet gsi) ;-) Aber dr Goran het denn schnäll emol "no! no drugs!!" gseit!! Si het aber gar nid meh wölle wüsse und het nur e kurze Blick in euses Büsli gworfä (zum Glück het euse VW-Bus dönti Schiibe) und witergwunkä!!
So, denn wäre mr aso z'Schwedä acho... s'erste wo mir gseh händ, isch halt nur Autobahn gsi!! Das hämmer jo jetzt gnue gseh, drum jetzt au keini Föteli meh vo däm!! In Helsingborg simmer denn ab dr Autobahn und si durs Städtli gfahre und denn no öpe 30 km bis zum Campingplatz, wo mr denn no grilliert händ und am Reisebricht gschafft händ!!
