Am 9.00 isch im Kiss si Wecker ab und mir si go z'Morgä ässe. Nochhär hei mr nomol biz wölle go aneliggä und denn spöter ind City. Aber mir hei beidi nüm chöne ischlofä (isch vilicht an dä Kaffis gläge?) Denn hets no afo rägne und denn si mr halt biz im Hotelzimmer umeghängt und hei schwedischs Färnseh gluegt und biz im Internet go umesurfä... händ unter anderem das schwedischä Lied wo mir ständig im Radio ghört hei wölle suechä - und mir si sogar erfolgrich gsi!!
am spötere Nomittag het dr Räge denn nocheglo und mir händ eus ready fürd d'City gmacht. Ziel isch s'Vasa-Museum gsi. Dört isch es alts Kriegsschiff wo vo es paar hundert Johr (ca. vor 300 bis 400 Johr) baut wordä isch und denn öpe bi dr Testfahrt kippt und gsunkä isch. Si händ ebä e chline Konstruktionsfehler gmacht - si händ dr Schwerpunkt z'wiet obe gmacht, do si diä unteri Kanonereihe z'wiit undä platziert hei und so dört nid meh hei chöne belaschte. Vor ca. 50 Johr hei si denn das Schiff borgä und wider ufbaut - si hei diä abgfallenä Originalteili widr für d'Rekonstruktion verwändet, was si nüm gfundä hei isch denn eifach mit neuä Teil versehä wordä. Leider isch es zimli dunkel gsi dört inne, me het das Ding öpe nid chöne fötelä... Schins isch das so, damit das "Schiffli" nid so schnäll verfallt. Abr zum Glück gits jo do no diä tolli Langzytbeliechtig ;-)
Wo denn s'Museum (wo vo usse au wiä es Schiff usgseht) zue gmacht het simmer no biz dur d'Stadt gloffä und si denn no öpis go ässe. Denn si mr widr zrugg ins Hotel und denn spöter no biz in Usgang. Dr Fotiapparat het müesse dähei bliebä - dä het Usgangverbot gha ;-)
