Widr Punkt 9i isch dr Wecker ab, Morgäessä isch agseit gsi. Denn parat mache und alles packe und go uscheckä. Eigentlich hei mr no e chline Abstächer ind Stadt wölle go mache zum öpis go chaufä... Aber wo mr denn hei wölle euses Büsli us dr Parkluckä bewegä, het dä eifach nid wöllä! Es het usgseh wiä d'Hamsbräms no zoge wär, es het hinde eifach glüft bim Gas geh. Abr d'Handbräms isch es nid gsi. Hm? - Komisch... Kurze Check unterem Auto und es paar neui Versüech. Aber nüt isch gange, und mir hei au nid gseh wo s'Problem isch. Irgendwiä het eifach s'eintä Rad hindä blockiert - kei Ahnig wieso! Aso, hämmer mol dr Wageheber gholt und hei s'Büsli ufbockt. Wo denn s'Rad in dr Luft gsi isch, hets au nid dreiht - het eifach anere bestimmtä Stell blockiert. Aso hei mr das Rad mol abgschrubt und denn plötzlich hets dreiht... mh? Aso Rad widr dra und alles tip top! Mir hei nur immernoni gwüsst was s'Problem gsi isch und si so mit eme mulmigä Gfühl losgfahre, in dr Hoffnig das Rad blockiert nid während em Fahre!
Mir si denn grad z'erscht emol ufd Autobahn für e gwüssi Zyt. Denn si mr drab und si uf dr Hauptross (ab und zue au Näbeströssli) gfahre. Uf dr Karte isch diä Strecki ebe als schön izeichnet gsi - aber so schön isch das au widr nid gsi, allwäh si mr eifach scho z'verwöhnt gsi vo dä norwägische Strössli und drum si mr nid so begeisteret gsi. Lustig si eifach no diä Hüser do, ganz anderst wiä bi eus. Mir si sehr oft dur kilometerlangi Wälder gfahre, und dört hets ab und zue widr mol es chlises Dörfli bestehend öpe us 5 Hüser.
Mir hei eus denn widr e Zältplatz uf dr Karte usgsuech und hei dä au agfahre - isch rächt e schöne gsi, grad am See! Mir hei denn e VW-Büsli-Reihä mit eusem Modäl verlängeret :-) Uf dr anderä Sitä vo eus si 2 jungi Schwizer gsi (wo leider au kei Mayonnaise gha hei). Wo mr denn uf dr Kartä gluegt hei wo mr genau si und wiä wiit mr no hei bis ganz im Süde vo Schwedä (am Di hei mr ebe plant dört wäg dr Fähri uf Dütschland go luegä) und mir hei müesse feststellä, dass mr scho sehr sehr im südä si :-) Si viel witer gfahre als mr eigentlich vorgha hei, jänu! Mir hei denn no grilliert und es paar Bierli gno und denn zimli müed go pfusä! Do mr jetzt jo au widr es rächts Stück südlicher si, isch au scho viel früehner dunkel wiä dass mrs gwöhnt si.
