Hüt am Morgä si mr zum erste mol vom Räge und nid vo dr Sunnä gweckt wordä. Es het dussä richtig abegloh - zum Glück hei mr s'meiste über d'Nacht inegno. Eusi schwizer Nochberä heis leider nid ganz gschafft vor em Räge alles zämme z'packä und so si halt es paar Sache "biz" nass wordä. :-) Mir hei denn usnahmswies mol im Büsli z'Mörgelet und hei us em Schärme d'Lüt beobachtet, wiä si gegänä Räge akämpfä! Denn wos biz nocheglo het, hei mr eus denn au use gwagt und hei afo zämmerumä, damit mr denn gli chöne witer... Aso eigentlich hei mr jo für dä Tag e Badetag mit evtl. erä Kanufahrt plant gha - aber so chas halt go!
Mir si denn gli emol losgfahre, richtig blauä Himmel! Eigentlich hei mr gar kei würklichs Ziel gha, so simmer eifach mol richtig nöchst grösseri Stadt gfahrä (Kristianstad) - dört hei mr eus mit emä leckäre Burger vom King verpflägt und si biz go lädelä. Mir si denn aber vom Räge igholt wordä und si so widr zrugg ins Büsli, d'Flucht vor em Räge isch aso witergangä! Mir si unter anderem widr dur Fäld und Wald gfahre - hei au widr so chlini Dörfli im Wald gseh. Verbi am Volvo-Wärk (nachdäm mr scho s'Scania- und Saab-Wärk gseh hei, si mr bi Volvo mol ind nöchi gfahre und hei es Föteli gmacht) und zahlriche Kornfälder simmer richtig Küste gfahre, zum e Campingplatz go suechä.
Nach dä erstä paar Plätz hei mr müesse säge, dass mr allwäh doch besser widr ins Landesinnerä gönge - denn au do si alli Campingplätz öpe vo Dauercamper bsetzt. Uf em Wäg zu emä See in dr Nöchi hei mr es Schild gseh vo emä Camping, aso simmer dört au schnäll go gügslä - dä Platz im Wald innä gsi und het öpe keini Lüt gha. E Rezeption hei mr au nid gfundä, so hei mr denn mol ein gfrogt. Dä Camping het kei Rezeption gha, me het sich eifach chöne es Plätzli suechä und neh. Zum zahle chunt denn d'Bsitzerin immer verbi, diä het öpe 150 Meter vom Platz gwohnt. So hei mr e sehr gemühtlichä Platz gha und hei au bis z'Obe spoht chöne lut Musig losä. Dr Räge hei mr schinbar au abghänkt, dä het eus zum Glück nüm gfundä! ;-)
