Am 9:45 isch d Fähri uf Islay gfahre. Wo si denn pünktlich am 5 ab 12i agleit hett simmer zerscht mol go luege wenn d Ardbeg Distillerie die nächst Füehrig hett. Die a de Kasse hett eus gseti das grad eini gstartet hett, ob mer eus no dere ahänge wänd. So smmer denn zu dene gfüehrt worde und händ die Füehrig chönne mitmache. Schlussendlich hämmer dnen no degustiere chönne und da in leere Mage ohni zmorge oder zmittag :o)
Als zweits simmer denn zur Laphroaig und händ eus zur nächste Füehrig agmäldet. Do mer no e halb Stündli Zit gha händ, hämmer no euses obligate Mittags-Sandwiches gha.
Die Füherig isch sehr interessant gsi, hett eine wo scho sit '74 dört schafft gmacht. So wie er gredet hett muess er au die ganze Arbeitsabläuf kenne. Mer händ vo allem probiere chönne au vo de Maische bevors brennt wird, sowie au vom Low Wine (noch em erschte brenne) und gege End au vome früsch abgfüllte Fass. So hett mer denn au de Unterschied zum fertig glagerte Whisky am Schluss gschmeckt. Also die Füehrig isch absolut zum witerempfehle!
Aschliessend simmer no chrüz und quer über d Insle gfahre. Isch nid sehr Spektakulär alles vomm mit Moor / Torf.
Euse Camping hämmer bi de Kintra Farm gfunde, die isch direkt am Meer und bietet s Land bis zum Strand zum Campe ah. Isch sehr schön dört, doch s WC isch recht wit entfernt und Strom hetts au kein gha. trotzdem hett d Batterie glängt und s Züg im Chüelschrank isch chalt blibe.
