Punkt 9i simmer wie abgmacht i de Garage gsi. Das Ersatzteil hett scho uf eus gwartet gha. Nochdem s doch no länger wie die versprocheni halb Stund gange isch, und er es Rohr wo dem ähnlich gsi isch wo mir brucht hätte, hämmer scho dänkt dass öppis nid ganz stimme cha. noch ere witere viertel Stund isch de Garagist denn zu eus cho und hett verzellt, dass das Rohr nid ganz passt hett (es isch es falsches gsi) und si euses alte eifach an Flansch gschweisst händ. Hoffentlich hebt das denn bis mer wider zrugg sind!
Mir händ MaWo Bescheid geh, si sind au grad am Abfahre gsi. Uf de erste Autobahnrastätt hämmer eus denn troffe. Mir sind a de Küste entlang richtig Norde gfahre. Im landesinnere hämmer geg di 25°C gha, a de Küste denn wider öppis um 15-20°C und chli windig. Aber endlich Sunne. Uf em Campingplatz hett si eus gseit, dass si scho sit Wuche nume räge und schlecht Wetter händ. Das sig de ersti sunnig Tag. Hoffentlich nid de letschti i de nächste 4 Wuche!