Noch ere halb Stund Fahrt hett sich de Uspuff wider emol bemerkbar gmacht. Isch scho wider abenand. Diesmol nid im Flansch, sondern hinter em Flansch. Mir händ eus vo de Hamburger verabschiedet und mit ihne abgmacht, dass mer möglichst bald nochechömed. Also simmer uf d Suechi noch ere Garage gange. Die ersti hett kei Lift für eus gha, aber si händ denn ummetelefoniert und eus in e anderi Garage gschickt. Hett sich denn usegstellt, dass die nid nume Autos mached, sondern au no Lastwäge. Si hän die ganz Gschicht agluegt. Aber schinbar chöned si innert nützlicher Frist kei Ersatzteil organisiere. So händ sis eifach gschweisst und mit händ am drei denn witerfahre chönne (nimmt mi wunder wie langs hebt, nimm nid ah dass es bis am Schluss vo de Reis hebe wird). Z Obe am 6i simmer denn in Durness acho und händ euse Platz näbe MaWo ineh chönne.