Am 9i simmer ufgstandä und hei mol mit dä Gastgäber z'Mörgelet und si denn so am Mittag mol ufbrochä quer dur Hamburt. Mir hei eus mehreri Ziel vorgno und s'Navigationssystem het eus au schön brav an diä richtiä Ort gfüehrt. S'erstä Ziel isch ca. 35Km entfärnt gsi und isch e Ort an dr Elbe gsi wo alli Schiff begrüesst, bzw. verabschiedet wärde. Mir hei eus dört denn ins Restaurant gsetzt und beobachtet wiä diversi Schiff uf Hamburg igfahre si... Jedes Schiff wird denn mit Nationalhymnä begrüesst und denn gits au no verschiedeni Infos über das Schiff, also wohär es chunt, mit was es belade isch, wiä lang es isch, wiä viel PS es het und wiä schnäll d'Höchstgwindigkeit het, usw.
Nach däm feinä Fisch-Menü simmer denn no uf Blankenese - das isch au e sehr speziells Örtli wo mehr oder weniger nur über diversi Stäge erreichbar isch und öpe nur richi Lüt wohnä. Mir hei aso dört schöni Villenä gseh.
Als 3. Ziel isch s'U-Bot gsi wo me cha besichtigä. I däm U-Bot isch es extrem äng gsi und links, rächt, obe und undä alles voll mit irgendwelchä Kabel, Maschine, Hebel und Azeigä. Nid nur dr Goran het dört inne nid chöne stoh, sondern au dr Kiss het teilwies müesse gebückt laufä. Natürlich het me denn au immer dur diä bekannte Luckenä müesse stiegä. Ächt unglaublich wiä so gwüssi Lüt chöne über Wuche wohnä, ihri Zimmer si dämentsprächend natürlich au sehr beschränkt gross.
Bis mr dähei gsi si, isch au scho wider Obe gsi und mir hei denn nach emä gemütlichä Bierli in dr Sunnä e feins Nachtässe dörfä gniessä.
Hütt hämmer eifach nume en fuule gmacht und händ eus mol chli usgrueht bevors denn witer goht