Nochdem mir d Nacht ime typische Stadt-Campingplatz verbrocht händ simmer denn früeh wider witer gfahre, händ schliesslich so schnell wie möglich am Nordkapp welle sii! Zerscht simmer a de Küste vo Schwede entlang gfahre (wobi mer nume Wald gseh händ) und denn ca 400km durch Finnland dure, wo mer denn au de Polarkreis überschritte händ.
Nocher denn durch Wälder wo nume all 50km e Dorf cho isch. Witer nördlich sind denn die Bäum immer chleiner worde und nume no so 2, 3 Meter hoch gsi und es hett vieli chleini Seee und Tümpel gha. Aber da isch eus denn au bim Zältplatz wo mer am Obe in Norwege ufgsuecht händ au zum Verhängniss worde. Es hett so viel Schnogge gha, wo sich uf eim gstürzt händ. Mir chöneds niemerem witerempfehle, sind total verstoche worde!
