Es isch eusi ersti Nacht nach dr Überschrittig vom nördlich Polarkreis gsi, das heisst d'Sunnä isch ab do nüm unter gange. Dr Goran isch mol am 2.30h verwache will er so durscht gha het und es isch dussä eifach no taghell gsi, d'Sunnä isch no so höch gstandä wiä in dr Schwiz öpe am 4eri am Nomitag!
Wo mir denn ufgstandä si und mol use si hei eus d'Schnogä öpe agriffä, es isch rächt extrem gsi... au im Büsli hei mir nach em Umlade öpe 20 Stück dinnä gha und hei eini nach dr anderä müesse kaputt mache! Mir si denn so schnäll wiä möglich abgfahre vo däm Camping und hei eus richtig Nordkapp gmacht.
Uf em Wäg ans Nordkapp hei mr no einigi Schwizer krüzt, es isch halt scho es beliebts Touristä-Örtli. Nachdäm mir dr Tunnel und dr Itritt fürs Nordkapp zahlt hei, simmer mol dört ufe Parkplatz gfahre... Mir si natürlich no im T-Shirt gsi do mir vorhär jo no Sunnä gha hei, aber dört Obe isch es extrem näblig gsi und arsch-chalt! Mir si denn mol kurz alles kurz go aluegä und denn am Nomi mol zrugg ins Büsli wo mr unter anderem eusi Standheizig im Büsli testet hei und e 5-liter Bierfässli gleert hei.
