Nach dr Übernachtig am Nordkapp hei mr gseh, dass sich s'Wätter bizeli besseret het und so hei mr eus nomol ufä Wäg zu dr berüehmtä Wältkugelä gmacht und so no eins, zwei Souveniers go chaufä. Mir hei ändlich au mol biz witer als 20 Meter gseh und hei so no es paar Föteli gschossä. Denn hei mr eus widr startklar für d'Abfahrt gmacht und si losgfahre. Je witer abe mir cho si, desto besser isch au s'Wätter wordä.
Euses nächste Ziel isch d'Stadt namens Hammerfest gsi, das isch diä nördlichst glägeni Stadt vo Europa. Mir hei eus denn scho am früehä Nomi e Zältplatz gsuecht. Uf däm Campingplatz wo mr denn au gfundä hei (ohni hilf vom Navi) ;-) hämmer gmerkt, dass mr e Internetverbindig hei - drum hei mr denn grad an eusem Reisebricht gschafft und denn au ändli mol öpis ufeglade.
Gegänä Obe isch denn s'militärgrüenä VW-Büsli mit BE Kennzeichä wo zur glichä Zyt ufs Nordkapp ufegfahre isch, au uf eusä Zältplatz itroffä. Es isch es Ehepaar gsi und mir si denn mit denä ins Gspröch cho und hei denn au no zämme z'Nacht gässe. Zur spöterä Stund isch denn no es jungs Päärli us Norwäge eus cho unterhalte und mir hei e Hammerfescht mit denä gha (vilicht isch es jo am Ortsname gläge?!?). Uf jedefall hei mr Bier drunkä mit denä bis so am 2h ume, denn si diä jungä 2 Norwäger no ind Stadt go danze und mir hei eus langsam ins Bettli gmacht.
