Eusä Camping-Nochber het eus am Obe vorhär öpis vonerä Adolfkanonä verzellt, wo me grad in dr Nöchi cha go aluegä. Also, hei mr eus am früehä Nomitag zu däm Museum gmacht und hei dört e Füehrig mitgmacht ufemä Militärgländ. Diä Dütschä hei im zweitä Wältkrieg d'Küsteartillerie in Norwäge uszbauä. Insgesamt si 7 söttigi Kanonä ufgstellt wordä, teilwies basierend uf norwegischä Plän.
Sone Kanonä het e Kaliber vo 40,6 cm und si diä grösstä, wo je als Küsteartillerie ufgstellt wordä si. Uf Trodenes si 4 söttigi Kanonä gstandä, jedoch nur no 1 wo hüt no schiesstauglich isch. Unter derä Kanonä hets no Bunker für d'Gschoss, Wachunterkünft, Kraftwärk, Sanitäralage, Heizig und Notusgäng gha. Will me mit dä 1030 Kg schwerä Granate nur grad 42 Kilometer wit cho isch, het me diä sogenannti Adolfgranate produziert, wo nur 600 Kg schwer gsi si- mit denä isch me denn 56 Km wit cho.
Das ganze Konzept vo derä Kanonä isch rächt faszinierend, vorallem für diä Zyt vor em zweitä Wältkrieg. Alles het natürlich mechanisch funktioniert, und het im Notfall au ohni Strom chöne betriebä wärde. Zielbemässigä si au no vo Hand usgarbeitet wordä und hei ca. bis uf 70 Meter genau gstummä. Dr Rückstoss bim Schiessä het über 1 Meter betreit und me het pro Minute 1 Granate chöne abschiessä. D'Bedienig vo einerä Kanone isch vo 68 Männer usgfüehrt wordä.
Mir hei eus denn ufd Witerfahrt richtig Lofotä gmacht, das isch e Inselgruppä wo schins sau schön müesse si. Verbi an schöne Landschafte simmer denn bim letztä Stück no wäge Bauarbeitä vonerä chlinä Schotterstross ca. 30 Minutä ufghalte wordä - aber mir hei das locker gno, schliesslich hei mr jo Feriä, oder!? ;-) Und für Unterhaltig während dr Wartezyt isch au gsorgt gsi. E alti Iheimischi het schinbar freut gha, dass si ändli mol öper zum schwätze het. Gli druf hei mr denn e chline aber schönä Campingplatz gfundä und es het afo rägne, was eus aber nid am grillierä ghinderet het - dank euserä super Markisä (Sunnästorä).
