Nach dr rägnische Nacht simmer widr ufbrochä richtig schöners Wätter. Mir hei denn neumä ufemä Rastplatz e churze halt gmacht vo wo au diä folgendä 3 Bilder si.
Mir si denn no es chlises Städtli names Svolver go aluegä, vo dört us hät me verschiedeni Tourä chöne mache mit emä Böötli - aber wiä immer isch das au völlig übertüürt gsi und mir heis si glo.
Imä anderä Städtli hets es Museum gha über Art und Wies wiä d'Fischer früehner gläbt hei. Näbedra in Kabelvag hets no es Museum gha über d'Meerestier vo dä Lofotä, was mr denn au si go aluegä.
s'nöchstä Städli wird in dä Reisefüehrer als das "Venedig vom Nordä" bezeichnet, drum hei mr au uf Henningsvaer e chline Abstächer gmacht. Es Stückli witerwäg hets denn no es Wikingermuseum gha, aber au das isch eus z'übertüürt gsi und mir heis lo si.
Do lut online-Wätterbricht hüt dr letscht sunnig Dag für diä nöchst Wuchä sött si, hei mr dänkt mir möche e Fisch ufem Grill. Drum simmer denn unter anderem au go Fisch ichaufä, was es für eine gsi isch hei mr noni usegfundä. :-) Mir hei denn eifach ufem Camping in Ramberg ufe Grill gheit und er isch nid mol so schlächt gsi. Mir si denn no biz an wissä Strand abe vom Camping go d'Mitternachtssunnä aluegä... Sunnä isch zwar in dä letztä Täg niä unter gange, aber meistens hinter emä Bärg verschwundä in dr "Nacht". Es isch also s'erschtä mol gsi wo mir um Mitternacht d'Sunnä no gseh hei. Wiä me uf dä Bilder gseht, stoht d'Sunnä zwar scho rächt tief - aber untergange isch si nid, sondern widr gstiegä.
Do mr hüt doch nomol e sunnigä Tag verwütscht hei, simmer grad nomol es Tägli uf däm Camping bliebä und hei mol e fuulä Tag gmacht und biz gsünnelet. Es macht zwar nid dr Aschin dass s'Wätter schlächter wird, aber me weiss es jo niä - mir wärdes gseh... Uf däm Camping hets erstuhnlicherwies rächt viel jungi Lüt, was im hochä Nordä eher e Sälteheit isch.