A däm Tag hei mr eigentlich plant gha, schnäll go luegä wenn d'Fähri richtig Bodö fahrt, also widr wäg vo derä Inslägruppä namens Lofoten. Mir hei denn evtl. grad e Fähri wölle buechä und no dr westlich Zipfel vo dä Lofotä go aluegä. Allerdings hei mr denn an dr Station vo dr Fähri gseh, dass in 2 Stund eini Fahrt, also am 14:00h und denn erscht widr am 18:00h widr eini. Und es si scho sehr viel am warte gsi und drum hei mr denn au mol agstellt, in dr 3 Reihä nach denä wo scho vorreserviert hei. So nach emä Zytlä warte, hei mr denn gmerkt dass es allwäh nüm längt für eus... Trotzdäm hei mr mol abwartet und si öpe no diä letztä gsi wo ufd 14:00h-Fähri hei chöne... Schwein gha! :-) Diä Fähri isch aber au öpe überbelade gsi, änger hät me diä Fahrzüg allwäh nüm chöne in das Schiffli zwänge... Und au im Ufenhaltsrum hets zwenig Sitzplätz gha, mir hei denn ufem Deck usse müsse go Liegestüehl holä und diä in Gang stellä. Dussä hets ebä leider grägnet.
Nach derä 3 stündigä Fahrt hei mr denn ufä me Parkplatz widr e offnigs W-Lan gfundä und drum hei mr denn au grad no es paar neui Reisebrichtli ufeglade.
Euses nöchstä Ziel isch denn d'Suechi vo emä Zältplatz gsi. Mir hei denn au bald einä gfundä, dä isch aber öpe überfüllt gsi und nach Charte und Navigationssystem isch sunscht keinä in dr Nöchi gsi... Trotzdäm simmer mol uf em empfohläne Strössli Nr. 17 witergfahre und mir si au fündig wordä! E älterä Heer het e chline Campingplatz abotä, alles super - wenig Lüt, gratis Internet und e schöns Plätzli näbe emä anderä VW-Büsli us Österrich. Dört hei mr denn no Znacht gmacht und si denn einisch ab ins Bettli.