Am Morgä isch eus dr Zältplatzinhaber no churz cho bsuechä und cho frogä öb alles i.O. gsi isch. Er het eus am Obe vorhär no es chlises Heftli geh über diä Stross Nr. 17, also was es alles so git zum aluegä usw. Isch ächt widr mol e sympatischä Zälplatz gsi.
Uf dr Fahrt zur nöchste Fähri hei mr denn i däm Reise-Heftli gseh, dass es e Gletscher git. Dä hei mr eigentlich wölle go aluegä, si aber denn scho z'wiet gfahre und hei en denn drum nur vo witem agluegt. Bi derä Ussicht hei mr denn au grad no öpis gässe.
Mir hei denn zerscht e chlineri Fähri gno wo öpe 10min gange isch und denn bizeli spöter no eini wo 1 Stund goht. Uf derä Fährifahrt hei mr denn dr nördlichi Polarkreis wider überschrittä... also isch ab jetz nüt me mit 24h Sunnä! Diä Wältchugelä uf em Inseli isch grad bi dr Überschrittig vom Polarkreis.
Wider isch es langsam Obe wordä und mir hei e Camping müesse suechä... leider het me do im Nordä ame nid grad e grossi Uswahl und muess sich halt eifach z'friedä geh mit däm wos het. Mir hei denn eine gfundä, allerdings halt widr e rächt vollä mit vielnä älterä Camper mit ihrnä Wohnmobil. Bim grillierä isch denn no es anders VW-Büsli us dr Schwiz cho z'fahre, welles mir au scho mehrmols atroffä hei... z.B. ufem Campingplatz vo Ramberg und denn uf dr 3 stündigä Fährifahrt uf Bodö. Drum simmer denn biz mit däm jungä Ehepäärli zämme ghockt und heis Lustig gha...
