Am Morgä, bwz doch scho widr fascht Mittag simmer nach em traditionellä Kaffi am Morgä schnäll go Tanke und ab uf diä nöchst Fähri. Mir si zwar zytlich biz knap dra gsi, aber es het eus denn zum Glück doch grad no glängt ufs Schiffli... Und witer isch es gange richtig Südä, verbi an verschiedene Fjords usw.
Eis Ziel hei mr eus no vorgno für dä Tag, und zwar hei mr öpis über e Loch imä Bärg gläse wo sich Torghatten nennt. Dört si mr denn au ane und si diä 20 Minute uf dä Bärg ufe gwanderet... unterwägs hei mr no e es Päärli atroffä us Norwäge, dr Maa isch allerdings e Schwizer gsi und drum hei mr denn mit denä no biz pläuderlet. Er het eus unter anderem no verzellt, dass das Loch i däm Bärg vomä Gletscher stammt... das Iis het sich halt eifach si Wäg gmacht, au wenn e Felsä im Wäg stoht.
Grand näbedrah hets au grad e Camping gha, allerdings het dä eus widr mol nid passt und mir si go witersuechä... Natürlich si mr denn au widr fündig wordä und hei eus es schöns Plätzli ergatteret. Leider hets denn widr biz afo Rägne und isch biz chüeler gsi. Aber au dasmol het eus das nid ghinderet zum dussä hockä... dank euserä super Markise! ;-)