Am nöchste Morgä, bzw. öpe am Mittag simmer denn losgfahre richtig Kristiansund. Dört simmer no kurz ins Turistä-Büro damit mr diä berüehmti Autostrecki mit dä vielä Bruggä au findä. Mir hei ebe no dähei in dr Schwiz mol öpis über diä Autostrecki gläse wo Atlantik-Küstenstrasse genennt wird, schins isch diä Stross zur schönstä Autoreis vo dr Wält gkürt wordä... Das hei mr natürlich müesse gseh!
z'erscht hei mr aber no ufä Fähri müesse und denn no es paar KM fahre bis diä schöni Stross afot... Kurz nach dr Fähri het denn dr Goran plötzlich gmerkt, dass mit dr Schaltig vom Auto öpis nid stimmt. Er het nüm chöne usem 3. Gang use. So simmer denn mol neumä ufä Parplatz gfahre und hei eus das mol agluegt, aber natürlich nüt entdeckt. Mir hei eus denn nach dr nöchste Garage erkundigt und si mol dört anegfahre so guet dass es gange isch... Leider si diä Mechaniker aber grad kurz vor ihrnä Feriä gsi und hei Füürobe gmacht, si hei eus denn ane anderi Garage verwiese wo öpe 20Km witer wäg gsi isch. Dört si mr denn au ane und in dr erstä Garage i däm Ort isch nur no ei Mech ume gsi und dä het kei Zyt gha. Näbedra isch no e anderi Garage gsi und diä hei eusä Dehler mol ufä Lift gno und biz am Schaltgestänge umegrissä... Si hei aber dr Fehler au nid gfundä und hei eus ane VW-Garage in Molde (ca. 30Km entfärnt) verwiesä. Dört simmer denn au ane, und zwar isch eus nur no dr 2. und dr 3. Gang zur Verfüegig gstandä. Mir si denn in diä Stadt inegfahre, wo natürlich au verschiedeni Krüzigä mit Amplä gha hei... Dört hei mr denn gli mol diä VW-Garage gfundä, allerdings si diä au grad am Füürobe mache gsi und mir hei am nöchste Tag nomol verbi müesse. z'erscht aber hei mr no e Camping in dr nöchi müesse suechä, und wiä chönts au anderscht si - dä Camping wo am nöchste wo derä Garage gläge isch, isch natürlich usbuecht gsi...
Mir hei denn doch no es Plätzli gfundä wo au so ca. 30Km vo dr VW-Garage gsi isch. Dört hei mr eus no öpis feins z'Nacht gmacht und überleit, was ächt s'Problem bi eusem Büsli chönt si und wiäs ächt söll witer go... Müesse mr übers Wuchenänd ine Hotel? Müesse mr s'Büsli vo dr Versicherig lo zrugg ind Schwiz füehrä und sälber mit em Flugzüg hei? Oder müesse (dörfä) mr für immer do in Norwäge bliebä? ;-)