Am nöchste Morgä het eusä Wecker scho!!! am 6:30h glüte und mir hei eus parat gmacht zum au früeh in dr Garage z'si... Natürlich hei mr au scho mol packt, für e Fall dass mir ines Hotel müesse.
Mir si also wider nur mit em 2. und 3. Gang zur Garage gfahre, wo sich scho gli dr Chef vo derä grossä VW-Garage Zyt für eus gno het. Si hei dr Dehler widr ufä Lift gno und hei nach emä Fehler gsuecht, leider ohni grosse Erfolg. Nach ca. 1,5 Stund het dr Chef vo dr Garage nomol e Probefahrt gmacht und het eus gseit, dass si leider nüt hei chöne mache und mir halt so müesse zrugg ind Schwiz fahre... Er het denn aber doch nomol e Rundi wölle go dreihä, zämme mit em einte Mechaniker. Si sind denn widr ufe Lift gfahre und hei öpe nomol 1 Stund dra ume gmecht. Mir hei das ganze biz chöne beobachte vo dussä und hei denn grad gseh, wiä dr einti Mechaniker euses Büsli isch go fötelä :-) Wahrschinlich het er noniä sonä Umbau vomä VW-Büsli gseh. :-)
Wo denn diä Herrä wider use cho si, hei si eus eus mit dr positivä Nochricht überrascht. Alles isch widr guet gsi, jedä Gang goht widr ine. Eus isch e Stei vom Härze gheit... Wahrschinlich isch s'Hauptproblem s'Getriebeöl gsi. Mir hei so paarmol gseh, dass euses Büsli neumä nid ganz dicht isch (wiä mir jo au) :-) Aber bi jedem Öl-Check hei mr no gnue Öl dinnä gha... jetzt wüsse mr au, was für Öl dass euse Dehler verliert. :-)
Wo mr diä ca. 3 Stundä Arbet vo denä 2 (mängisch au meh) Mechaniker hei müesse zahle, simmer grad biz überrascht gsi - si hei grad mol CHF 100.- vo eus wölle... Mit so wenig hei mr aso au niä im Läbe grächnet.
Nach erä kurze Probefahrt zur Bank (hei jo widr Gäld brucht), simmer denn nomol zrug zur Atlantik-Küstenstrasse (Atlanterhavsvegen). Diä hei mr jo gar noni würkli chöne aluegä, bzw. gniessä. Diä Küstestross isch zwar nur grad mol 8 Km lang, aber me fahrt in derä Zyt über diversi Bruggenä - diä einti isch sehr speziell baut, me fahrt z'erscht e schwungvolls Kürvli und fahrt denn ime Boge über diä Brugg.
Mir si denn no biz witer gfahre am Atlantik nochä und si denn ufä Fähri in Molde. Denn simmer no biz gfahre und hei denn e Camping gsuecht. S'Wätter isch in dr zwüschä Zyt besser wordä und mir hei widr Sunnä gha, allerdings mit Wolke.
Mir hei gseit, falls mr am nöchste Morgä immerno so guets Wätter hei, bliebä mr no e Nacht uf däm Zältplatz. Und so isch es denn au gsi, mir hei blaue Himmel gha dr ganz Tag und hei bis z'Obe keis Wülchli gseh... So hei mr dr ganz Tag biz gsünnelet.