Nach eusem entspannendä Tag ufem Camping in Valle, simmer am morgä widr ufbrochä richtig Geirangerfjord. Das isch bi euserä letschtjöhrigi Reis eusi nördlichsti Übernachtig gsi... Mir hei uf dr Charte gseh, dass me mit dr Fähri uf das Geiranger cha fahre - drum hei mr denn das au gmacht. Allerdings hei mr grad kei Platz me gha uf dr Fähri und hei drum nomol 1.5 Stund dörfe uf diä nächst warte.
Uf derä Fährifahrt hei mr eus es Plätzli ufem Deck ergatteret und hei diä tolli Ussicht gnossä. Es isch über d'Lutsprächer no verschiedenigs verzellt wordä über dä Fjord usw. Dä Fjord isch rächt schmal, mir hei also links und rächts Bärgä gha und si an verschiedene Wasserfäll verbi cho. Wär eusä letschtjöhrig Reisebricht kennt, weiss das uf däm Fjord grossi Krüzfahrtschiff dure chöme. Leider hei mr hüt no kei söttigs gseh... aber vilicht chunt jo morn am Morgä no eis?!
Do mr eus scho super uskennt hei uf däm Camping, hei mr eus no biz Wösch ob do - leider hei mr kei richtigs Wäschmittel drbi gha, sondern nur sone Reisetube für Handwösch unterwägs. Wo mir denn das ind Wäschmaschine ine do hei, hets inne grad mol alles mit Schum gfüllt... mir hei scho angscht gha, dass alles neumä uselauft! :-) Aber zum Glück isch doch no alles guet gange! Nur s'tömplerä isch nid ganz so usecho wiä mir eus das erhofft hei... mir hei allwäh biz z'viel Chleider ine do, so isch das Züg au nid würkli troch wordä - und so hei mr halt in eusem Büsli müesse e Wöschleinä zieh!
