Leider hei mr am Morgä au keis Schiffli ufem Fjord gha und drum hei mr eus denn au zur Abfahrt bereit gmacht. Aber do eusi Wösch wo mr über d'Nacht vornä im Auto ufghänkt hei, noni trochä gsi. Mir hei also denn eifach dr hinteri Teil vom Büsli mit Schnuer bespannt und d'Wösch dört ufghänkt. Wenn me in Innäspiegel gluegt het, het me nur es paar Unterhose gseh umeflatterä :-)
Do Geiranger ime Tal unde lit, hei mr als ersts grad es Passströssli vor eus gha. Natürlich het me denn nach erä gwüssä Höchi au e schöni Ussicht zrugg ufä Fjord gha.
Nach em erstä Passströssli isch denn au scho gli s'nöchste cho... Widr mol eis wo d'Tier frei umelaufe. Mängisch gseht me diä Tier öpe nid, do si rächt guet tarn si. Aber mir hei zum Glück keis überfahre :-)
Euses nöchste Ziel isch dr Ort Balestrand am Sognefjord gsi. Zum dört anecho het me halt nomol überä Pass müesse. Leider isch d'Ussicht ganz obe vo Wolke verdeckt gsi, aber me gseht glich biz abe ufs Strössli wo me vor sich het...
In Balestrand simmer letscht Johr scho gsi und hei dazumals e chlinä, aber schöne Camping gha - drum simmer gar keini andere meh go aluegä und si uf diräktem Wäg dört ane. Eusi Wösch wo jo im hinterä Teil vom Büsli ghange isch, isch leider immernoni trochä gsi. So hei mr se emol lo hange und hei eusi Standheizig und d'Lüftig aglo... mir hei eus also schnäll e grossä Tumpler bastlet :-) Und es het super funktioniert, eusi Wösch isch schnäll emol trochä gsi.