Nach em Ufenthalt in Balestrand hei mr denn widr biz witer in Südä wöllä. Als erscht simmer grad mol ufä Fähri und denn isch au gli widr mol es Passströssli cho... Dasmol isch es no biz witer ufä gange, überall isch Schnee gläge.
Natürlich gohts bi jedem Pass einisch widr abwärts... verbi an verschiedenä Wasserfäll und Hoornodläkurvä.
Mir hei eus uf derä Tagesroutä no vorgno, dass mr dur ä längsti Tunnel vo Norwäge fahre - dä isch ganzi 24.5 Km lang (Als Verglich: Dr Gotthardtunnel isch 16.9 Km lang!!) Mir si eus nid sicher, öb dä in Norwäge sogar dr längst in Europa isch... Das wärde mr denn mol no im Internet nocheluegä! I däm Tunnel si es paar mol blau belüchteti Stellä cho... Wahrschinlich eifach damit diä langi Fahrt nid so langwilig wird!? :-) Leider isch es in dä dunklä Tunnel nid grad eifach es Föteli z'mache.
Denn isch witer gange abe in Südä... mir hei unterwägs no e chline Abstächer über ä historischi Stross gmacht und si denn widr zrugg ufd Hauptstross.
Natürlich isch d'Durchfahrt vom Ort namens Geilo eifach es Muss gsi :-) Zwar wird dä Ortsname do anderscht usgsprochä, und zwar "Jeilo", aber für eus Schwizer isch das glich witzig ;-)
Leider het denn plötzlich euses Büsli widr afo spinnä - also widr s'glichä Problem mit dr Gangschaltig. Natürlich hei mr eus zu däm Zytpunkt wo das Problem uftaucht isch voll ime menschäleerä Gebiet befundä... Mir si denn mol im 2te Gang witer gfahre und hei denn mol no biz am Schalthebel umegrissä, so hei mr denn doch no dr 3. Gang inebrocht und si i däm witer gfahre. Mir hei eus denn no e Camping gsuecht, do es denn au scho spöter am Obe gsi isch.