Bim hütigä Tag hei mr nid genau gwüssti wiäs söll witer go, do mr jo das Problem mit dr Gangschaltig noni behobä gha hei. Mir hei denn eifach mol probiert wiä guet dass es goht und hei vorsichtshalber mol e Garage ufgsuecht. Mir hei denn dank em Navigationssystem sogar e VW-Garage gfundä, nur hei diä kei Zyt gha... Drum hei mr eus denn vorgno, dass mr mol so witerfahre richtig Oslo und dört ine Garage gönge - denn d'Gäng si alli widr inegange, wenn au nid immer sehr eifach... Mir hei ab und zue eifach müesse uskupplä, bevor mr dr Gang widr hei chöne ine due.
Uf em Wäg uf Oslo hei mr denn gseh, dass e Stross uf Larvik goht - dört hei mr letscht Johr eusi erschti Nacht in Norwäge verbrocht und hei no 2 Mädels kennäglert gha. Drum hei mr eusä Plan kurzfristig gänderet und si richtig Larvik zum es spontans bsüechli go mache.
Am spöterä Obe simmer denn no mit denä 2 ins nächstä Städtli ine Bar. Dört simmer denn no mit andernä Norwäger ame Tisch ghockt und hei alli mitenand e riesä Wälle gha... Mir hei widr mol dörfä feststellä wiä schnäll me do im Usgang cha pleite si! :-) E Grosses (5dl Bier) chostet do halt eifach öpe CHF 12.-! Aber egal, me gönnt sich jo süscht nüt, oder?! ;-) Uf jedefall isch es denn schlussändli öpe 5i gsi, wo mr si go schlofä.
