Bizeli müed und bizeli verkateret simmer denn ufd Stross richtig Hauptstadt, Oslo.
Mir hei dasmol diä schönä Strössli wägglo und si ufd Hauptverbindigsstross. Wo mr in Oslo acho si hei mr wölle go e Fähri für ä nöchst oder übernöchst Tag go reservierä, aber es si alli Fährenä uf Dänemark scho usbuecht gsi. Diä einti hätte mr am Samschtig becho, aber diä hät eus über CHF 600.- gkostet und so hei mr eus entschlossä, emol es Stückli witer südwärts z'fahre und denn dört neumä luegä. So chöne mr denn au no euses räschtlichä schwedischä Gäld usgeh... ;-)
Mir si denn no in berüehmtä Park in Oslo namens Vigelandsparken und hei eus diä verschiedenä Statueä agluegt wo dä Parkabschnitt schmückä.
Zimli müed (wieso wüsse mr au nid) simmer denn ufä Camping und hei no öpis feins z'Nacht gmacht und si denn eher früeh ins Bettli.