Do mer de Preikestollen im Lysefjord scho mindestens eimol gseh händ, simmer witer richtig Norde, zerscht über d 13 und denn nocher über d 520 und denn wider zrugg uf d 13 richtig Hardangerfjord. De Hardangerfjord hämmer i dem Sinn nid gmacht, mer sind in Sitearm Sorfjord und denn an Eidfjord wo mer au übernachtet händ.
Uf em Campingplatz hetts gheisse, dass zwüsche 8i und 9i am Obe d Bsitzer cho ikassiere chömed. Wo mer acho sind, hetts grad no e zweits WoMo do gha (Dütschi) wo duscht, Abfall entsorgt und s Gschirr gmacht händ und den abgreist sind. Für eus hetts usgesh, wie wenn die sich do cho verpflege cho sind und denn ohni Zahle wider verreist sind. Am nächster Tag hämmer si denn ca 10km näbedra wild Campiere gseh. Nid ganz fair.