Vollig verschlofe hämmer hütt! D Fabienne isch zwar um di 5i umme mol für es Stündli wach gläge (me cha nümm druff goh obs dunkel isch oder nid. Es isch nume no hell, drum müemer immerwieder uf d Uhr luege ob scho ufstoh-Zit isch oder nid). Schlussendlich simmer denn am halb 10i ufgschreckt, normal schlofe mer nume bis am 8i umme...
Bi relativ schönem Wetter simmer denn losgfahre und händ de "Atlanterhavsveien" richtig Kristiansund gmacht. Was eus überrascht hett, mer händ kei Fähri müesse neh, es git jetzt en Tunnel wo mer zahle muess.
Trondheim hämmer rächts ligge loh und sind ganz usse ad Küste gfahre und händ eus en Camping gsuecht.
