Hütt isch de Tag vo de schlechte Strosse und de Schotterpiste gsi, drum simmer eigentlich au nid wirklich vorwärts cho. Aber jetzt vom Afang ah.
Uf em Campingplatz hämmer gseh, dass es irgendwo i de Nöchi no e Bunkeraalag mit Kanone us em zweite Weltkrieg haa sett. Also hämmer eus uf d Suechi noch dere gmacht. Es hett zume schöne Spaziergängli durch e Park (Wald) gfüehrt, wos Schöfli gha hett und ageblich au Elche (Also das mit dene Elche isch eso es Thema. Überall sind die Schilder, dass mer uf Elche ufpasse sett. Nume hämmer bis jetzt keine gseh. Sind die Viecher i de letzte beide Johr usgstorbe? Oder isch das ganze nume en Marketing-Gag für d Touris??? :o)
Die Kanone händ leider erst ab em 10.Juni offe, das heisst mer händ kei Füehrig chönne mache. Also simmer denn los und witer gfahre. Mer händ hütt sehr schlächti Strosse gha. Zerscht hetts zwar scho no e Asphalt-Stross gha, die isch aber so kaputt gsi, dass mer mit öppe 30km/h e Schlaglöcher usgwiche sind. Nocher isch es denn zunere Schotterpiste worde. Im Gsammte hämmer öppe 100km uf so schlechte Strosse verbrocht.
