Mit Wulche und Räge simmer den ufgstande. E churzi Recherche im Internet hett zeigt, dass es i de nächste zwei Täg nid besser wärde wird, also hetts e Planänderig geh: D Lofoten wärde s nächste mol usgiebig erkundent und mer gönd wider zrugg, vor allem aber richtig Süde. Vilicht hämmer denn au mol no es paar Sunnestrahle und nid nume knapp 10° mit viel Wind.
Also ab, quer über d Lofoten zur Fähre richtung Bodö. Dört acho hämmer festgestellt, dass erst ab morn de Summerfahrplan in Kraft isch. Das hett bedütet, erst ab morn fahred die Fähre wider und das im Zweistundetakt.Plan B isch gsi, wider die guet 120km quer über d Lofote zrugg fahre und über die ander Fähri zum Festland. Es isch so Windig und dementsprechend wällig gsi, dass bi dere Überfahrt einigi Iheimischi sich übergeh händ müesse. Eus isch es zum Glück nid so schlecht worde. Das Geschaukel isch aber scho no heftig gsi!